Azərbaycan Prezidenti İlham Əliyev sentyabrın 10-da Bakının Qaradağ rayonunda “Fabriora Group” MMC-nin 27 milyon manatlıq kağız və gigiyenik məhsullar istehsalı müəssisəsinin açılışında iştirak edib.
MSNews.az xəbər verir ki, dövlət başçısına iqtisadiyyat naziri Mikayıl Cabbarov və “Fabriora Group” MMC-nin təsisçisi İbrahim Uyğur müəssisənin fəaliyyəti barədə məlumat veriblər.
Təxminən 11 hektar ərazidə yerləşən müəssisədə uşaq bezləri, müxtəlif növ salfetlər, yuyucu vasitələr və digər kağız-gigiyena məhsulları istehsal ediləcək. İstehsalda həm yerli, həm də xaricdən gətirilən xammal və materiallardan istifadə olunacaq. Zavod Almaniya, İtaliya və Türkiyənin müasir, yüksək avtomatlaşdırılmış texnologiyaları ilə təchiz edilir.
Müəssisədə istehsal ediləcək məhsullar daxili bazarla yanaşı, Gürcüstan, Qazaxıstan, Rusiya, Yaxın Şərq ölkələri və digər xarici bazarlara ixrac olunacaq. Burada 240 nəfərin daimi işlə təmin edilməsi planlaşdırılır.
“Fabriora Group”un müəssisəsi İqtisadiyyat Nazirliyinin tabeliyindəki Əmlak Məsələləri Dövlət Xidmətinin keçirdiyi investisiya müsabiqəsi vasitəsilə özəlləşdirilib. Layihənin ümumi investisiya dəyəri 27 milyon manatdır.
Şirkət investisiya təşviqi sənədi çərçivəsində istehsal avadanlığının idxalı zamanı ƏDV və gömrük rüsumlarından ümumilikdə 1 milyon manatlıq güzəşt əldə edib.
Yeni müəssisənin fəaliyyətə başlaması yerli gigiyena məhsulları istehsalının genişləndirilməsi, idxaldan asılılığın azaldılması və Azərbaycan istehsalı olan məhsulların xarici bazarlara çıxış imkanlarının artırılması baxımından əhəmiyyətli hesab olunur.
