Rusiya Prezidenti Vladimir Putin sentyabrın 5-də Kremldə ABŞ Prezidenti Donald Trampın nümayəndələri Stiv Uitkoff və Cared Kuşneri qəbul edib.
MSNews.az xəbər verir ki, danışıqların əsas mövzusu Rusiya-Ukrayna müharibəsinin dayandırılması istiqamətində ABŞ-nin yeni diplomatik təşəbbüsüdür. Görüşü Kreml rəsmi şəkildə təsdiqləyib.
Rusiya tərəfdən danışıqlarda Putinin xarici siyasət üzrə köməkçisi Yuri Uşakov və prezidentin xarici ölkələrlə investisiya-iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiyalar Fondunun rəhbəri Kirill Dmitriyev iştirak edir. Dmitriyev Uitkoff və Kuşneri daha əvvəl Moskva hava limanında qarşılayıb. “Reuters” bildirir ki, Dmitriyev və Uşakov ABŞ nümayəndələrinin Putinlə əvvəlki görüşlərində də Rusiya nümayəndə heyətində yer alıblar.
Görüşün açıq hissəsində Putin Moskva ilə Vaşinqton arasında birbaşa təmasların faydalı olduğunu bildirib və Uitkoffla Kuşnerlə işləməyin Rusiya tərəfi üçün rahat olduğunu deyib.
Uitkoff isə Donald Trampın Putinə salamlarını çatdırıb və ABŞ nümayəndə heyətinin səfəri zamanı atəşin dayandırılması ilə bağlı tədbirlərə görə təşəkkür edib. Putin öz növbəsində amerikalı vasitəçilərin təhlükəsizliyinin təmin olunması üçün Rusiyanın bütün zəruri addımları atacağını bildirib.
ABŞ Prezidenti Donald Tramp bir gün əvvəl Uitkoff və Kuşnerin Moskva və Kiyevə səfər edəcəyini açıqlayaraq Vaşinqtonun müharibənin dayandırılması üçün “konkret təklifinin” olduğunu bildirmişdi. Təklifin detalları hələ ictimaiyyətə açıqlanmayıb.
“Reuters” yazır ki, ABŞ nümayəndələrinin Moskvadakı danışıqlardan sonra sentyabrın 6-da Kiyevə gedərək Ukrayna Prezidenti Volodimir Zelenski və digər rəsmilərlə görüşməsi gözlənilir.
Rusiya və Ukrayna arasında əsas fikir ayrılıqları, xüsusilə ərazi məsələləri və Ukraynanın gələcək təhlükəsizlik statusu üzrə qalmaqda davam edir. Görüşün yekunlarına dair hələ rəsmi açıqlama verilməyib.
