Polşanın müxalif Hüquq və Ədalət Partiyasının (PiS) lideri Yaroslav Kaçinski Konstitusiya Tribunalı ətrafında baş verən hadisələri hakimiyyətin məhkəmə sisteminə müdaxiləsi kimi qiymətləndirərək ölkənin “polis dövlətinə çevrildiyini” bəyan edib. O, vətəndaşları etirazları davam etdirməyə çağırıb.
MSNews.az xəbər verir ki, Kaçinski bu barədə oktyabrın 30-da X sosial şəbəkəsində paylaşım edib. Polşanın “Rzeczpospolita” nəşrinin məlumatına görə, müxalifət lideri polis qüvvələrinin Konstitusiya Tribunalının ərazisinə daxil olmasını kəskin tənqid edib.
“Bu gündən Polşa polis dövlətinə çevrilir. Buradan isə avtoritarizmə, daha sonra totalitarizmə birbaşa yol açılır”, – Kaçinski bildirib.
O, Baş nazir Donald Tusku qanunları pozmaqda ittiham edərək Konstitusiya Tribunalını ölkənin azadlığı və suverenliyinin təminatçısı adlandırıb.
“Biz polyaklar qorxudulmağa imkan verməməliyik. Tamamilə qanuni vətəndaş etirazları davam etməlidir”, – deyə müxalifət lideri vurğulayıb.
Hadisələr Konstitusiya Tribunalının sədri Boqdan Şvençkovski və onun müavini Bartlomey Soxanskinin səlahiyyətlərinin müvəqqəti dayandırılması barədə qərardan sonra gərginləşib. Tribunalın ərazisinə polis qüvvələri cəlb edilib, müxalifət tərəfdarları isə etiraz aksiyası keçiriblər.
Bununla belə, polisin Tribunal binasını zorla ələ keçirməsi barədə iddialar təsdiqlənməyib. Polis əməkdaşları binaya daxil olmadıqlarını, ərazidə təhlükəsizliyin təmin edilməsi məqsədilə fəaliyyət göstərdiklərini bildiriblər.
“Polskie Radio” xəbər verir ki, Polşa polisinin baş komendantı Marek Boron noyabrın 1-də keçirilən əməliyyatların qanunvericiliyə uyğun olduğunu açıqlayıb. O, polisin siyasi mübahisənin tərəfi olmadığını vurğulayıb.
Baş nazir Donald Tusk isə hökumətin addımlarını hüququn aliliyinin bərpası ilə əsaslandırır. Müxalifət bu mövqeni qəbul etmir və prosesin Konstitusiya Tribunalının müstəqilliyinə təhlükə yaratdığını bildirir.
Polşa Prezidenti Karol Navrotski də yaranmış böhranla əlaqədar Seneqala səfərini yarımçıq dayandıraraq ölkəyə qayıtmaq qərarı verib.
