İran Prezidenti Məsud Pezeşkiyanın istefa ərizəsi təqdim etməsi barədə yayılan məlumatlar rəsmi Tehran tərəfindən təkzib edilib.
MSNews.az xəbər verir ki, “Iran International” mənbələrə istinadən Pezeşkiyanın İranın ali rəhbərinin ofisinə istefa məktubu göndərdiyini iddia etmişdi. Nəşrin məlumatına görə, prezidentin bu addımı SEPAH komandirlərinin dövlət idarəçiliyində təsirinin artması və hökumətin əsas qərarvermə proseslərindən kənarda qalması ilə bağlı olub.
Lakin İran Prezident Administrasiyası bu xəbərləri rədd edib. “Anadolu Agentliyi”nin məlumatına görə, Prezident Administrasiyası rəhbərinin kommunikasiya üzrə müavini Mehdi Təbatəbai Pezeşkiyanın istefası barədə yayılan məlumatları “yalan” adlandırıb və bunu bəzi xarici media orqanlarının “media oyunlarının davamı” kimi qiymətləndirib.
Təbatəbai bildirib ki, Pezeşkiyan İran xalqına xidmət yolundan geri çəkilməyəcək. Onun sözlərinə görə, İran “birlik və həmrəylik yolundan” imtina etməyəcək.
“Indian Express” də İran rəsmilərinə istinadən yazır ki, Tehran istefa xəbərlərini əsassız sayır. Nəşrin məlumatına görə, İran tərəfi bu iddianı “reallığın əvəzinə arzu olunan ssenarinin dərc edilməsi” kimi təqdim edib.
Sosial şəbəkələrdə Pezeşkiyanın “Mən sağ olduğum müddətcə fəaliyyətimi davam etdirəcəyəm” məzmunlu ifadələri də geniş yayılıb. İran mediasında yayılan çıxışlarda prezidentin ölkənin çətin dövrdən keçdiyini, lakin idarəetmə və müqavimət meydanının tərk edilməməli olduğunu vurğuladığı bildirilir. Bununla belə, həmin sitatların istefa iddiasına birbaşa cavab kimi rəsmi mətn formasında yayıldığını təsdiqləyən ayrıca prezident administrasiyası sənədi hələlik açıqlanmayıb.
Məsələ İran daxilində siyasi gərginlik və güc mərkəzləri arasında münasibətlər fonunda gündəmə gəlib. Son aylarda Pezeşkiyan administrasiyasının internet məhdudiyyətlərinin yumşaldılması və bəzi daxili idarəetmə məsələlərində daha fərqli xətt izləməsi sərt mövqeli dairələrin tənqidi ilə qarşılanırdı.
