Pakistanın Ermənistandakı ilk fövqəladə və səlahiyyətli səfiri Şəfqət Əli Xan etimadnaməsini Ermənistan Prezidenti Vaaqn Xaçaturyana təqdim edib.
MSNews.az xəbər verir ki, mərasim sentyabrın 11-də İrəvandakı Prezident Sarayında keçirilib. Pakistan hökumətinin rəsmi “Press Information Department” resursunun məlumatına görə, Xaçaturyan səfiri yeni diplomatik missiyasının başlanması münasibətilə təbrik edib və Ermənistan–Pakistan münasibətlərinin inkişafına dəstək verməyə hazır olduğunu bildirib.
Şəfqət Əli Xan öz növbəsində Pakistan prezidenti və baş nazirinin salamlarını Ermənistan rəhbərinə çatdırıb, İslamabadın İrəvanla ikitərəfli münasibətləri genişləndirmək niyyətində olduğunu vurğulayıb.
Görüşdə ticarət və investisiya, təhsil, mədəniyyət, insanlararası əlaqələr və digər iqtisadi sahələrdə əməkdaşlığın inkişaf etdirilməsi imkanları müzakirə olunub.
Ermənistan Xarici İşlər Nazirliyi bildirib ki, Şəfqət Əli Xan iki ölkə arasında diplomatik münasibətlərin yaradılmasından sonra Ermənistana təyin olunan ilk Pakistan səfiridir. O, Ermənistanda qeyri-rezident əsasda fəaliyyət göstərəcək və iqamətgahı Birləşmiş Ərəb Əmirliklərinin Əbu-Dabi şəhərində yerləşəcək.
Bundan əvvəl səfir etimadnaməsinin surətini Ermənistan xarici işlər nazirinin müavini Mnatsakan Safaryana təqdim edib, daha sonra xarici işlər naziri Ararat Mirzoyanla görüşüb. Tərəflər ikitərəfli və çoxtərəfli əməkdaşlığın genişləndirilməsi, eləcə də müqavilə-hüquq bazasının formalaşdırılması məsələlərini müzakirə ediblər.
Ermənistan və Pakistan arasında diplomatik münasibətlər 31 avqust 2025-ci ildə Çinin Tyantszin şəhərində rəsmən yaradılıb. Həmin gün Ermənistanın xarici işlər naziri Ararat Mirzoyan və Pakistanın baş nazir müavini, xarici işlər naziri Məhəmməd İshaq Dar diplomatik münasibətlərin qurulması haqqında Birgə Kommunike imzalayıblar. Ermənistan Xarici İşlər Nazirliyi bildirir ki, münasibətlərin suverenliyə və ərazi bütövlüyünə qarşılıqlı hörmət prinsipləri əsasında inkişaf etdirilməsi razılaşdırılıb.
