Norveç millisinin və İngiltərənin “Mançester Siti” klubunun hücumçusu Erlinq Holand sevgilisi İzabel Hoqsenq Yohansenlə birlikdə “Dolce & Gabbana”nın İtaliyada keçirilən moda tədbirinə qatılıb.
MSNews.az xəbər verir ki, cütlük iyulun 14-də Siciliyanın Taormina şəhərindəki qədim Antik Teatrda təşkil olunan “Alta Sartoria” kişi kolleksiyasının nümayişində iştirak edib. Holand tədbirin ön sırasında yer alan tanınmış qonaqlardan biri olub. Bu barədə “Vogue” məlumat yayıb.
“People” nəşrinin məlumatına görə, Holand ağ və fil sümüyü rəngli, ikidüyməli ipək kostyum geyinib. Futbolçunun obrazını şərf formalı köynək, qiymətli daşlarla bəzədilmiş qurbağa formalı broş, günəş eynəyi və mavi dəri ayaqqabılar tamamlayıb.
İzabel Hoqsenq Yohansen isə kristallarla bəzədilmiş ağ tül libas seçib. Cütlüyün bir-birinə uyğunlaşdırılmış ağ geyimləri moda mediasının diqqətini çəkib.
Tədbir Norveç millisinin 2026-cı il dünya çempionatındakı çıxışını başa vurmasından üç gün sonra keçirilib. Norveç iyulun 11-də Mayamidə baş tutan 1/4 final görüşündə İngiltərəyə əlavə vaxtdan sonra 1:2 hesabı ilə məğlub olub. Holand mundialda keçirdiyi ilk dörd oyunda yeddi qol vurub.
“Dolce & Gabbana”nın 2026-cı il “Alta Sartoria” kolleksiyası 1930-cu illərin kişi zərifliyini müasir üslubda təqdim edib. Nümayişdə Holandla yanaşı, aktyor Teo Ceyms və digər məşhur qonaqlar da iştirak ediblər.
