Kolumbiya millisinin futbolçusu Xaminton Kampas İsveçrə ilə dünya çempionatı oyunundan sonra özü və ailəsinə ünvanlanan ölüm təhdidləri səbəbindən komanda yoldaşları ilə birlikdə ölkəsinə qayıtmayıb.
MSNews.az xəbər verir ki, “Associated Press” futbolçunun sosial şəbəkə hesablarının təhqir və təhdid xarakterli mesajlarla dolduğunu, Kampasın şərhləri məhdudlaşdırdığını və təhlükəsizlik məqsədilə Kolumbiyaya gedən təyyarəyə minmədiyini yazıb.
Hadisə Kolumbiyanın iyulun 7-də dünya çempionatının 1/8 finalında İsveçrəyə məğlub olmasından sonra baş verib. Vankuverdə keçirilən qarşılaşmanın 120 dəqiqəsi 0:0 hesabı ilə yekunlaşıb, İsveçrə penaltilər seriyasında 4:3 hesablı qələbə qazanıb.
Kampas əlavə vaxtın 114-cü dəqiqəsində komandasını önə keçirə biləcək əlverişli vəziyyətdə topu qapıdan kənara vurub. Bununla belə, o, penaltilər seriyasındakı öz zərbəsini dəqiq yerinə yetirib. Kolumbiyanın məğlubiyyəti Davinson Sançes və Kuço Ernandesin zərbələrini qola çevirə bilməməsindən sonra rəsmiləşib.
Kolumbiya Futbol Federasiyası Kampas və ailəsinin həyatına, eləcə də təhlükəsizliyinə qarşı yönələn təhdidləri qəti şəkildə pisləyib. Federasiya heç bir idmançının ölkəsini təmsil etdiyinə görə hədəfə çevrilməməli olduğunu bildirib və Baş Prokurorluqdan məsul şəxslərin müəyyənləşdirilməsi üçün təcili araşdırma aparmağı istəyib.
Kampas sosial şəbəkədə paylaşdığı müraciətdə futbolun ağır anlardan da ibarət olduğunu qeyd edib və azarkeşləri hörməti qorumağa çağırıb. O, məyusluq və fikir ayrılıqlarının nifrətə, qorxuya və zorakılığa haqq qazandırmadığını vurğulayıb.
Hadisə Kolumbiya futbolunun ən faciəli səhifələrindən biri olan Andres Eskobarın ölümünü yenidən gündəmə gətirib. Eskobar 1994-cü il dünya çempionatında ABŞ ilə oyunda avtoqol vurmuş, komandanın turnirdən kənarlaşdırılmasından bir neçə gün sonra Medellində güllələnərək öldürülmüşdü.
Kampas Argentina klubu “Rosario Central”da çıxış edir. Onun hazırda harada olduğu və Kolumbiyaya nə vaxt qayıdacağı barədə rəsmi məlumat verilməyib.
