ABŞ Federal Təhqiqatlar Bürosunun direktoru Keş Patelin oktyabrın 14–15-də Rusiyaya səfər etməyi planlaşdırdığı bildirilir.
MSNews.az xəbər verir ki, “Politico” bu barədə ABŞ rəsmisinə və səfər planları ilə tanış olan digər mənbəyə istinadən məlumat yayıb. Xəbəri “Reuters” də “Politico”ya istinadən təsdiqləyib.
Məlumata əsasən, Patelin səfərinin ilk dayanacağı Moskva olacaq. FTB direktorunun daha sonra Sankt-Peterburqa getməsi nəzərdə tutulur.
Səfər baş tutarsa, Pateli qəbul edən tərəfin Rusiyanın Federal Təhlükəsizlik Xidmətinin — FSB-nin olacağı ehtimal edilir. Bununla belə, görüşlərin gündəliyi, müzakirə olunacaq məsələlər və Patelin Rusiya Prezidenti Vladimir Putin və ya yüksəkvəzifəli Kremlin nümayəndələri ilə görüşüb-görüşməyəcəyi məlum deyil.
FTB və Rusiya tərəfi səfər planını hələ rəsmi şəkildə təsdiqləməyib. FTB-nin mətbuat xidməti yayılan məlumatlarla bağlı şərh verməyib. Buna görə oktyabrın 14–15-i ilkin tarix kimi qiymətləndirilir və səfərin proqramında dəyişiklik edilə bilər.
Patel 2025-ci il fevralın 20-dən FTB-nin doqquzuncu direktoru vəzifəsini icra edir.
“Politico” səfərin vəzifədə olan FTB direktoru üçün qeyri-adi addım olacağını qeyd edir. ABŞ Federal Təhqiqatlar Bürosunun Rusiyaya səfər edən son rəhbərinin 2013-cü ildə Moskvaya gedən Robert Müller olduğu bildirilir.
