Ukrayna Prezidenti Volodimir Zelenski ABŞ-ın təklif etdiyi sülh planı üzərində görüşmələr davam edərkən ölkəsinin torpaq verməyəcəyini bir daha təsdiqləyib. Zelenski bildirib ki, Ukrayna Rusiyaya bir qarış belə torpaq vermək niyyətində deyil və bunu Ukrayna qanunları, Konstitusiya, beynəlxalq hüquq və əxlaqi baxımdan mümkün görmür. Rusiyanın isə müharibəni bitirmək üçün torpaq güzəşti tələb etdiyi bildirilir.
ABŞ prezidenti Donald Tramp əvvəlki planında bu istiqamətdə maddələr daxil etmişdi. O, bazar ertəsi günü Zelenskini planın son versiyasını oxumamaqla tənqid edib.
Zelenski London səfəri zamanı İngiltərə, Fransa və Almaniya liderləri ilə görüşdükdən sonra Brüsseldə NATO və Aİ rəsmiləri ilə görüşəcəyini açıqlayıb. O bildirib ki, sülh təklifləri son mərhələyə gəlib və plan çərşənbə axşamı günü ABŞ-a göndəriləcək.
Əvvəlcə 28 maddə olan planın hazırda 20 maddəyə endirildiyi, Ukrayna əleyhinə olan maddələrin isə çıxarıldığı qeyd olunub. Zelenski həmçinin Vaşinqtonun uzlaşma axtardığını da etiraf edib.
London görüşündə Ukrayna üçün təhlükəsizlik zəmanətləri və şərqi bölgələrin nəzarəti kimi həssas mövzular müzakirə olunub. Zelenski avropalı və ABŞ tərəfdaşlarının rus təcavüzünə qarşı birliyinin vacibliyini vurğulayıb. İngiltərə baş naziri Keir Starmer toplantıya ev sahibliyi edib, Emmanuel Makron və Fridrix Merz isə Ukrayna ilə həmrəylik nümayiş etdirərək ölkənin taleyinin Avropanın taleyi ilə bağlı olduğunu qeyd ediblər.
MS-News.az
