Almaniya hökuməti Böyük Britaniyanın “Trident” nüvə çəkindirmə proqramının maliyyələşdirilməsində Berlinin iştirakı ilə bağlı danışıqlar aparıldığı barədə məlumatları təkzib edib.
MSNews.az xəbər verir ki, “The Telegraph” diplomatik və təhlükəsizlik mənbələrinə istinadən Almaniyanın Britaniyanın nüvə potensialına maliyyə dəstəyi vermək imkanını nəzərdən keçirdiyini yazıb. Məlumata görə, Berlin öz nüvə arsenalını yaratmaq əvəzinə Böyük Britaniya və Fransanın mövcud çəkindirmə imkanları ilə əməkdaşlığı dərinləşdirməyə üstünlük verir.
Bu barədə “The Independent” də məlumat yayıb.
Mənbələrin iddiasına əsasən, mümkün variantlar arasında Almaniya sənayesinin gələcək sualtı qayıq və raket proqramlarında iştirakı, həmçinin Britaniyanın strateji nüvə infrastrukturunun adi silahlarla müdafiəsinə töhfə verilməsi nəzərdən keçirilir. Hesabatda Almaniyaya məxsus “Patriot” hava hücumundan müdafiə sistemlərinin Trident daşıyan sualtı qayıqların yerləşdiyi Şotlandiyadakı Fasleyn bazasının qorunmasına cəlb oluna biləcəyi də qeyd edilib. Lakin bu variantların qəbul edildiyinə dair rəsmi açıqlama yoxdur.
Bir gün sonra Almaniya hökuməti xəbərin maliyyələşdirmə hissəsini açıq şəkildə təkzib edib. “Handelsblatt” Almaniya hökuməti sözçüsünün müavini Steffen Meyerə istinadən bildirib ki, Britaniya və ya Fransa nüvə proqramlarının maliyyələşdirilməsi ilə bağlı belə danışıqlar və planlar mövcud deyil. Meyer bununla yanaşı, NATO daxilində nüvə çəkindirməsinin gücləndirilməsinə dair müzakirələrin aparıldığını təsdiqləyib.
Berlinin Avropanın nüvə çəkindirməsində daha fəal rol axtarması isə tamamilə yeni məsələ deyil. Almaniya və Fransa hökumətlərinin mart ayında yaydığı birgə bəyanatda iki ölkə arasında nüvə məsələləri üzrə yüksək səviyyəli koordinasiya mexanizminin yaradıldığı, Almaniyanın Fransa ilə nüvə təlimlərində konvensional qüvvələrlə iştirakının nəzərdə tutulduğu bildirilmişdi. Berlin vurğulayır ki, bu əməkdaşlıq NATO və ABŞ-nin nüvə çəkindirməsini əvəz etmir, onu tamamlayır.
Böyük Britaniyanın nüvə çəkindirmə sistemi isə artıq NATO-nun ümumi müdafiəsinə xidmət edir. Londonun rəsmi məlumatına görə, “Trident II D5” raketləri ABŞ-dan əldə olunur, “Dreadnought” sinifli yeni sualtı qayıqlar və “Astraea” adlı yeni nüvə başlığı isə Britaniyanın genişmiqyaslı modernləşdirmə proqramının əsas elementləridir. Bu da Britaniyanın nüvə potensialının bir sıra mühüm texnoloji istiqamətlərdə ABŞ-la əməkdaşlığa bağlı olduğunu göstərir.
