“Liverpool” Andoni İraolanın komandanın yeni baş məşqçisi təyin olunduğunu rəsmən açıqlayıb.
MSNews.az xəbər verir ki, “Liverpool” klubunun rəsmi məlumatına görə, 43 yaşlı ispaniyalı mütəxəssis 2026/27 mövsümü öncəsi Mersisayd təmsilçisinin sükanı arxasına keçəcək.
İraola “Liverpool”da Arne Slotu əvəz edəcək. Klubun açıqlamasında bildirilir ki, Slot şənbə günü komandadan ayrılıb və yeni mövsüm öncəsi baş məşqçi postuna İraola gətirilib.
İspaniyalı mütəxəssis son üç mövsümü “Bournemouth”da keçirib. “Liverpool”un rəsmi saytında qeyd olunur ki, İraola Premyer Liqa klubunu tarixində ilk dəfə avrokuboklara daşıyıb. “Bournemouth” ötən mövsümü turnir cədvəlində 6-cı pillədə başa vurub.
İraola ilk açıqlamasında “Liverpool”a keçidindən böyük həyəcan duyduğunu bildirib. O, klubun atmosferi, azarkeşləri, futbolçuları və titul uğrunda mübarizə aparmaq imkanının bu təklifi çox cəlbedici etdiyini vurğulayıb.
Andoni İraola futbolçu karyerası ərzində əsasən sağ cinah müdafiəçisi kimi çıxış edib. O, İspaniyanın Bask bölgəsində doğulub və “Athletic Club”da 12 mövsüm ərzində 500-dən çox oyuna çıxıb. İraola həmçinin İspaniya millisinin heyətində 7 oyun keçirib.
Məşqçilik karyerasına 2018-ci ildə Kiprin AEK Larnaka klubunda başlayan İraola daha sonra “Mirandes” və “Rayo Vallecano”da çalışıb. O, “Rayo Vallecano”nu La Liqaya yüksəldikdən sonra 2023-cü ildə “Bournemouth”un baş məşqçisi təyin olunub.
“Liverpool” İraolanın təyinatından sonra yeni mövsümə hazırlıq prosesinə başlayacaq. Klubun azarkeşləri ispaniyalı mütəxəssisin Premyer Liqadakı dinamik və intensiv oyun modelini “Anfield”də necə tətbiq edəcəyini maraqla gözləyir.
