Avropa İttifaqı Gürcüstan hakimiyyətinə qarşı ritorikanı sərtləşdirərək mümkün sanksiyalarla bağlı açıq siqnallar göndərib. Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas bildirib ki, Brüsseldə bu məsələ üzrə ümumi mövqe demək olar ki, formalaşıb.
Onun sözlərinə görə, 27 üzv dövlətdən 26-sı Gürcüstana qarşı sanksiyaların tətbiqi ideyasını dəstəkləyir, yalnız bir ölkə buna qarşı çıxır. Bu isə Aİ daxilində Tbilisinin hazırkı siyasi kursuna qarşı narazılığın yüksək səviyyəyə çatdığını göstərir.
Kallas vurğulayıb ki, Brüssel bir tərəfdən gürcü cəmiyyəti ilə əlaqələri gücləndirmək, Avropanın məqsədinin dəstək olduğunu izah etmək istəyir. Digər tərəfdən isə Gürcüstan hökumətinə açıq mesaj verilir: seçilən siyasi xətt Avropa dəyərləri ilə uyğun gəlmir.
Analitiklər hesab edir ki, bu bəyanat təkcə mümkün sanksiyalarla bağlı xəbərdarlıq deyil, həm də Aİ-nin Gürcüstana münasibətdə yanaşmasının dəyişdiyini göstərir. Artıq məsələ yalnız daxili siyasi gərginlik kimi deyil, ölkənin strateji istiqaməti – Avropa inteqrasiyası kursu prizmasından qiymətləndirilir.
Aİ rəsmisi əlavə edib ki, bəzi üzv ölkələrdə yeni hökumətlər formalaşdıqdan sonra sanksiyalar məsələsi yenidən gündəmə gətirilə bilər. Bu isə o deməkdir ki, Brüssel Gürcüstanla bağlı daha sərt addımlar üçün siyasi imkanları açıq saxlayır.
Ekspertlərin fikrincə, hazırkı kurs dəyişməzsə, Aİ-nin növbəti mərhələdə konkret iqtisadi və siyasi təzyiq alətlərinə keçməsi istisna olunmur.
