Rusiyada hərbi xidmətə çağırış yaşında olan kişilərin hərbi bileti və ya digər hərbi uçot sənədləri olmadığı halda xarici pasport üçün müraciətlərinin qəbulundan imtina edilə bilər. Rusiya Daxili İşlər Nazirliyinin bu açıqlaması hüquq müdafiəçilərinin etirazına səbəb olub.
MSNews.az xəbər verir ki, Rusiya DİN-in mövqeyi barədə oktyabrın 28-də “TASS” agentliyi məlumat yayıb. Nazirliyin materiallarına əsasən, çağırış yaşında olan şəxslərin hərbi uçot sənədlərinin olmaması xarici pasport üçün sənədlərin qəbulundan imtina səbəblərindən biri kimi göstərilib.
Lakin “Qovorit NeMoskva” nəşrinin məlumatına görə, Şüurlu İmtinaçılar Hərəkatının hüquq şöbəsinin rəhbəri Artyom Klıqa bu yanaşmanın mövcud inzibati reqlamentlə ziddiyyət təşkil etdiyini bildirib.
Hüquqşünasın sözlərinə görə, DİN-in reqlamentində 18–27 yaşlı müraciətçilər üçün hərbi biletin yalnız mövcud olduğu halda təqdim edilməsi nəzərdə tutulur. Klıqa vurğulayıb ki, hərbi biletin olmaması özlüyündə xarici pasportun verilməsindən imtina üçün qanuni əsas deyil.
“Yaxşı olardı ki, öz əmrlərini öyrənmək üçün qısa iclas keçirəydilər”, – deyə hüquqşünas nazirliyin açıqlamasını tənqid edib.
Rusiya Dövlət Dumasının Müdafiə Komitəsinin üzvü Aleksey Juravlyov da hərbi biletin olmamasının avtomatik imtinaya səbəb olmamalı olduğunu bildirib. Deputatın sözlərinə görə, sənəd mövcud deyilsə, DİN zəruri məlumatları hərbi komissarlıqdan özü əldə etməlidir.
Hazırda Rusiyada hərbi xidmətə çağırış yaşı 18–30 yaş müəyyən edilib. Bununla belə, pasportların rəsmiləşdirilməsi üzrə bəzi inzibati qaydalarda əvvəlki 18–27 yaş həddi göstərilir.
Məsələnin əsas mübahisəli tərəfi sənədlərin qəbulundan imtina ilə xarici pasportun verilməsindən imtinanın fərqli hüquqi prosedurlar olmasıdır. Mövcud məlumatlar hərbi bileti olmayan bütün kişilərə xarici pasport verilməsinin qadağan edildiyini göstərmir.
