İran İslam İnqilabı Keşikçiləri Korpusu (SEPAH) Hörmüz boğazının cənub hissəsində üç neft tankerinin dəniz minalarına düşərək partladığını və alovlandığını açıqlayıb. Daha sonra İran ordusu boğazın şərqində dördüncü tankerin də minaya düşdüyünü bildirib. Hadisələr strateji əhəmiyyətli dəniz yolunda təhlükəsizliklə bağlı narahatlığı artırıb.
MSNews.az xəbər verir ki, SEPAH-ın Hərbi Dəniz Qüvvələri bu barədə oktyabrın 29-da rəsmi bəyanat yayıb.
SEPAH-ın açıqlamasına görə, son 24 saat ərzində üç neft tankeri Hörmüz boğazının cənub hissəsində İranın icazəsiz hesab etdiyi marşrutla hərəkət etməyə çalışıb.
İran tərəfi gəmilərin radar və naviqasiya sistemlərini söndürdüyünü, həmçinin hərbi dəniz qüvvələrinin xəbərdarlıqlarına məhəl qoymadığını iddia edib.
Bəyanatda bildirilir ki, tankerlər minalara düşdükdən sonra partlayış baş verib və gəmilərdə yanğın başlayıb. SEPAH-ın məlumatına əsasən, ağır zədələnən tankerlər boğazın cənub sahilləri yaxınlığında tərk edilib.
İran hərbçiləri sözügedən marşrutun minalarla təhlükəli olduğunu vurğulayaraq gəmilərin sahiblərini və ekipajlarını xəbərdar ediblər.
SEPAH-ın ilk açıqlamasından sonra İran ordusu Hörmüz boğazının şərq hissəsində daha bir tankerin dəniz minasına düşərək alovlandığını bildirib. Beləliklə, İran silahlı qüvvələrinin məlumatlarında ümumilikdə dörd tanker barədə iddia irəli sürülür.
Lakin gəmilərin adları, hansı dövlətlərin bayraqları altında üzdükləri və hadisələr zamanı ekipaj üzvlərinin xəsarət alıb-almadığı açıqlanmayıb.
Böyük Britaniyanın Dəniz Ticarəti Əməliyyatları Mərkəzi (UKMTO) də Hörmüz boğazında bir gəmidə yanğın barədə məlumat daxil olduğunu təsdiqləyib.
Qurumun məlumatına görə, hadisə Oman sahillərindəki Xəsəb şəhərindən təxminən 25 dəniz mili şimal-şərqdə qeydə alınıb.
Lakin UKMTO yanğının məhz dəniz minasından qaynaqlandığını təsdiqləməyib. Gəminin vəziyyəti və ekipajın təhlükəsizliyi ilə bağlı məlumatlar araşdırılır.
İranın açıqlaması ABŞ Mərkəzi Komandanlığının (CENTCOM) Hörmüz boğazındakı əsas gəmiçilik marşrutlarının minalardan təmizləndiyini bildirməsindən sonra yayılıb. Tehran isə boğazın bəzi hissələrinin hələ də təhlükəli olduğunu və İranın müəyyən etdiyi keçid qaydalarına əməl edilməsinin vacibliyini vurğulayır.
İran tərəfi gəmiləri ABŞ hərbi komandanlığının açıqlamalarına əsaslanaraq riskli marşrutlara daxil olmamağa çağırıb.
Bu iki ölkənin gəmiçilik təhlükəsizliyinə dair açıqlamaları arasında fikir ayrılığının davam etdiyini göstərir.
