Yunanıstanın xarici işlər naziri Georgi Gerapetritis parlamentdə Egey və digər dəniz zonalarında sahl sularını indiki 6 dəniz milindən daha çox genişləndirmək niyyətində olduqlarını bildirib və gələcəkdə bu istiqamətdə addımların atılacağını söyləyib.
Bu, Yunanıstanın beynəlxalq dəniz hüququ çərçivəsində hərəkət etmək istədiyi bir qərardır və İtaliya ilə İoniya dənizində artıq belə bir genişlənməyə imza atılıb. Lakin Ankara bu məsələyə çox ciddi yanaşır; 1995-ci ildə Türkiyə Böyük Millət Məclisi Afinanın bu cür bir dəyişiklik etməsini “casus belli”, yəni müharibə səbəbi kimi qəbul edəcəyini elan edib.
Bu siyasi bəyanat uzun müddətdir ki, iki ölkə arasında Egey dənizindəki sərhədlər, sahil sularının hüdudları və xüsusi iqtisadi zonalar mövzusundakı mübahisələrin əsas katalizatorudur və bu yöndəki addımlar hər iki tərəfdən gərginliyi artırır.
Afina tərəfi bu genişlənməni beynəlxalq dəniz hüququna uyğun olaraq həyata keçirmək istədiyini vurğulayır və yalnız xüsusi hüquqi zonaların sərhədləndirilməsi məsələsini Türkiyə ilə dialoqla həll etməyə açıq olduğunu bildirir. Lakin Ankara bu mövqeyi qəbul etmir və belə bir addımın strateji və təhlükəsizlik baxımından Türkiyənin maraqlarına zidd olduğunu hesab edir; bu isə yalnız siyasi deyil, həm də hərbi riskləri gündəmə gətirir.
Bu qərarın reallaşması halında, iki NATO üzvü arasında uzunmüddətli münaqişənin yeni mərhələyə keçməsi, regionda hərbi və diplomatik gərginliyin artması kimi nəticələr doğura biləcəyi barədə ekspert rəy və müşahidələr mövcuddur.
