Niderland Krallığı Azərbaycan-Ermənistan münaqişəsi zamanı itkin düşmüş şəxslərin taleyinin müəyyənləşdirilməsi üçün yeni maliyyə yardımı ayıracaq. Vəsait həlak olanların qalıqlarının identifikasiyasına və dəfn yerlərinin aşkar edilməsinə yönəldiləcək.
MSNews.az xəbər verir ki, bunu Niderlandın xarici işlər naziri Tom Berendsen oktyabrın 26-da Bakıda Azərbaycanın xarici işlər naziri Ceyhun Bayramovla keçirdiyi birgə mətbuat konfransında açıqlayıb.
Nazirin sözlərinə görə, maliyyə dəstəyi İtkin Düşmüş Şəxslər üzrə Beynəlxalq Komissiya (ICMP) vasitəsilə təqdim olunacaq.
“Niderland Azərbaycan və Ermənistan xalqları arasında qarşılıqlı anlaşmanın təşviqinə yönəlmiş etimadın möhkəmləndirilməsi tədbirlərini dəstəkləyir”, – deyə Berendsen bildirib.
O, bu çərçivədə həlak olanların qalıqlarının müəyyənləşdirilməsi və dəfn yerlərinin aşkarlanması üçün yeni maliyyə dəstəyinin ayrıldığını açıqlayıb.
Yardımın konkret məbləği və layihənin icra müddəti barədə məlumat verilməyib.
Azərbaycan və Ermənistan arasında uzun illər davam edən münaqişə nəticəsində minlərlə insan itkin düşüb. Onların taleyinin müəyyənləşdirilməsi iki ölkə arasında humanitar əməkdaşlığın əsas istiqamətlərindən biri olaraq qalır.
“Reuters” agentliyinin məlumatına görə, Azərbaycan tərəfi münaqişə dövründən 4010 vətəndaşının itkin düşmüş hesab edildiyini, onların 782-nin mülki şəxs olduğunu bildirib.
Oktyabrın 8-də Azərbaycan və Ermənistan rəhbərləri itkin düşmüş şəxslərin axtarışının intensivləşdirilməsi məsələsini də müzakirə ediblər.
Niderlandın ayıracağı maliyyə vəsaiti insan qalıqlarının identifikasiyası və mümkün dəfn yerlərinin müəyyənləşdirilməsi istiqamətində aparılan işlərə əlavə dəstək verməyi nəzərdə tutur.
Berendsen ölkəsinin Cənubi Qafqazda sülh və qarşılıqlı etimadın möhkəmləndirilməsinə dəstəyini davam etdirmək niyyətində olduğunu vurğulayıb.
Nazir həmçinin Niderlandın Azərbaycanda mina təmizləmə işlərinə yardım imkanlarını araşdıra biləcəyini bildirib.
