ABŞ-nin İsraildəki səfiri Mayk Hakabinin baş müşaviri Devid Milşteyn toy dəvətnaməsində qonaqlardan ABŞ dolları və ya İsrail şekeli ilə pul hədiyyəsi istədiyinə görə diqqət mərkəzinə düşüb. Məxfi məlumatlara çıxış icazəsi olan müşavirin müraciəti əks-kəşfiyyat riskləri ilə bağlı suallar doğurub. Milşteyn isə sonradan mesajın səhvən daha geniş qonaq siyahısına göndərildiyini açıqlayıb.
MSNews.az xəbər verir ki, “Politico” nəşrinin sentyabrın 21-də yaydığı məlumata əsasən, Milşteyn sentyabrın 16-da göndərdiyi elektron toy dəvətnaməsinə pul köçürmək üçün QR kod əlavə edib. Nəşr dəvətnamənin görüntülərini araşdırdığını və onu alanlar arasında İsrail vətəndaşlarının da olduğunu bildirib.
Jurnalistlər müraciətin ABŞ Dövlət Departamenti və Ağ Evlə razılaşdırılıb-razılaşdırılmadığını soruşduqdan sonra Milşteyn qonaqlara yeni mesaj göndərib. O, hədiyyə barədə məlumatın yalnız bu məsələ ilə maraqlanan ailə üzvləri və yaxın dostlar üçün nəzərdə tutulduğunu, lakin səhvən bütün dəvətlilərə çatdırıldığını bildirib.
“Xahiş edirəm, bilin ki, biz heç bir növ hədiyyə qəbul edə bilmərik”, – deyə Milşteyn qeyd edib. Nəşrin məlumatına görə, bundan sonra ödəniş kodları dəvətnamədən çıxarılıb. İlkin müraciətdən sonra hər hansı pulun köçürülüb-köçürülmədiyi məlum deyil.
“Politico”ya danışan, adı açıqlanmayan kəşfiyyat əməkdaşı xarici ölkə vətəndaşlarından pul istənilməsini əks-kəşfiyyat baxımından ciddi risk kimi qiymətləndirib. Nəşrin məlumatına görə, Milşteynin yüksək məxfilik dərəcəli məlumatlara çıxış icazəsi var.
Səfir Mayk Hakabi isə müşavirini müdafiə edərək “Politico”nun təqdimatını tənqid edib. O, Milşteynin dostlarının toy hədiyyəsi barədə özlərinin soruşduqlarını bildirib və dəvətnamənin milli təhlükəsizlik təhdidi kimi təqdim olunması ilə razılaşmayıb.
Milşteyn hər hansı cinayətdə və ya məxfi məlumatlardan qanunsuz istifadədə ittiham olunmur. ABŞ Dövlət Departamenti nəşrin suallarını şərh etməyib.
