Kosovo Qəzza zolağında fəaliyyət göstərməsi planlaşdırılan, ABŞ-ın dəstəklədiyi Beynəlxalq Sabitləşdirmə Qüvvələrində iştirakını rəsmiləşdirən saziş imzalayıb. Qoşunların Qəzzaya konkret nə vaxt yerləşdiriləcəyi isə hələ açıqlanmayıb.
MSNews.az xəbər verir ki, saziş sentyabrın 7-də BSQ komandanı general-mayor Yasper Ceffersin Kosovoya səfəri zamanı imzalanıb. Sənədi Kosovo Təhlükəsizlik Qüvvələrinin (KSF) komandanı general-leytenant Başkim Caşari ilə “Sülh Şurası” və BSQ nümayəndələri imzalayıblar.
Bu barədə “Anadolu Agentliyi” və “Al Jazeera” məlumat yayıb.
Kosovonun bu missiyada iştirakı yeni qərar deyil. Kosovo Parlamenti aprelin 17-də hökumətin Kosovo Təhlükəsizlik Qüvvələrinin bir kontingentini Qəzzaya göndərmək qərarını 89 lehinə, 0 əleyhinə səslə təsdiqləmişdi. Aprelin 20-də isə Kosovo prezidentinin səlahiyyətlərini icra edən Albulena Haciu yerləşdirməyə rəsmi icazə vermişdi.
“Associated Press”-in məlumatına görə, Kosovonun missiyaya bir neçə onlarla hərbçi, o cümlədən humanitar və təhlükəsizlik tapşırıqlarında istifadə oluna biləcək mütəxəssislər göndərməsi nəzərdə tutulur. Kosovo müdafiə naziri Eyup Maqedonci bunu ölkənin beynəlxalq təhlükəsizliyin “istehlakçısından” onun təminatçısına çevrilməsi kimi qiymətləndirib.
BSQ komandanı Yasper Ceffers fevralda bildirib ki, İndoneziya, Mərakeş, Qazaxıstan, Kosovo və Albaniya qüvvəyə hərbi kontingent ayırmağa razılıq verib. Misir və İordaniya isə Qəzzada fəaliyyət göstərəcək polis qüvvələrinin hazırlanmasına yardım edəcək.
Plana əsasən, Beynəlxalq Sabitləşdirmə Qüvvələrinin vəzifələrinə Qəzzada təhlükəsizlik mühitinin sabitləşdirilməsi, mülki idarəetmə üçün şərait yaradılması və yerli polis qüvvələrinin hazırlanmasına dəstək daxildir. İlkin mərhələdə qüvvələrin Rəfah sektorunda yerləşdirilməsi nəzərdə tutulur. Uzunmüddətli hədəf təxminən 20 min BSQ hərbçisi və 12 min polis əməkdaşından ibarət təhlükəsizlik strukturunun yaradılmasıdır.
İyulun 31-də “Sülh Şurası” Qəzza planının növbəti mərhələsi üçün yol xəritəsi təqdim edib. Sənəddə HƏMAS-ın tərksilah edilməsi, İsrail qüvvələrinin mərhələli şəkildə geri çəkilməsi, idarəetmənin Fələstin texnokrat komitəsinə verilməsi, beynəlxalq qüvvənin yerləşdirilməsi və Qəzzanın bərpası nəzərdə tutulur.
Hazırda Kosovodan olan hərbçilərin və bütövlükdə BSQ kontingentinin Qəzzaya dəqiq yerləşdirilmə tarixi açıqlanmayıb.
