ABŞ Avropadakı hərbi mövcudluğunu yenidən nəzərdən keçirərək qitənin konvensional müdafiəsində əsas məsuliyyətin Avropa ölkələrinin üzərinə keçməsini istəyir.
MSNews.az xəbər verir ki, “Reuters”-in məlumatına görə, Pentaqonun siyasət üzrə rəhbəri Elbric Kolbi avqustun 27-də Brüsseldə NATO ölkələrinin səfirləri ilə görüşündə bildirib ki, alyans mövcud təhlükəsizlik şəraitinə uyğunlaşmalıdır. Onun sözlərinə görə, ABŞ-ın Avropadakı qüvvələrinin yerləşdirilməsi ilə bağlı aparılan araşdırma təkcə hərbi bazaların və qoşunların sayının nəzərdən keçirilməsi ilə məhdudlaşmır.
Kolbi bildirib ki, Vaşinqtonun məqsədi “daha davamlı və güclü, Avropanın rəhbərlik etdiyi konvensional müdafiə modelinə keçidi” sürətləndirməkdir. ABŞ rəsmisi bunu “NATO 3.0” adlandırılan yeni yanaşmanın bir hissəsi kimi təqdim edib. Bu modeldə Avropa müttəfiqlərinin qitənin konvensional müdafiəsi üçün əsas məsuliyyəti öz üzərinə götürməsi nəzərdə tutulur.
Pentaqonun rəsmi çıxış mətninə əsasən, Kolbi vurğulayıb ki, məqsəd avropalıların ABŞ-dan asılı tərəf deyil, bərabərhüquqlu təhlükəsizlik tərəfdaşı kimi çıxış etməsidir. Bununla yanaşı, o, Avropanın ABŞ üçün strateji əhəmiyyətini qoruduğunu və NATO-nun transatlantik təhlükəsizliyin əsas elementlərindən biri olaraq qaldığını bildirib.
Vaşinqton iyunda ABŞ qüvvələrinin Avropadakı yerləşdirilməsinə dair altı aylıq genişmiqyaslı təhlilə başlayıb. Son həftələrdə NATO ölkələrinə müdafiə xərcləri, hərbi strategiya, silah tədarükü, ABŞ qüvvələrinin bazalara çıxışı və Vaşinqtonun xarici siyasət prioritetlərinə dəstək kimi mövzuları əhatə edən sorğu göndərilib. Kolbi müttəfiqlərin cavablarının yekun qərarların hazırlanmasında nəzərə alınacağını deyib.
“Reuters”-in gördüyü sənədə əsasən, araşdırma nəticəsində ABŞ müdafiə naziri Pit Heqset üçün ən azı dörd fərqli variantın noyabrın 6-dək hazırlanması nəzərdə tutulur. Araşdırmanın tam olaraq dekabrda başa çatdırılması planlaşdırılır.
Proses Avropa ölkələrində ABŞ-ın qitədəki hərbi mövcudluğunu azalda biləcəyi ilə bağlı suallar yaradıb. Bununla belə, Kolbi bildirib ki, araşdırmanın əvvəlcədən müəyyən edilmiş yekun nəticəsi yoxdur və Vaşinqton müttəfiqlərlə məsləhətləşməni prosesin mühüm hissəsi hesab edir.
