Ukraynanın sabiq müdafiə naziri Mixaylo Fedorov Prezident Volodimir Zelenskinin hökumətdə müxtəlif vəzifələrə dair təkliflərini rədd etməsinin səbəblərini açıqlayıb.
MSNews.az xəbər verir ki, Fedorov “Ukrainska Pravda” nəşrinə müsahibəsində hökumət dəyişikliyindən sonra ona bir neçə vəzifənin təklif edildiyini bildirib. Bu vəzifələr arasında müdafiə və hərbi innovasiyalar sahəsinə cavabdeh baş nazir müavini postu da olub.
Sabiq nazirin sözlərinə görə, ayrıca nazirliyə rəhbərlik etməyən baş nazir müavini komanda formalaşdırmaq, rəhbər şəxsləri seçmək və yekun nəticəyə birbaşa təsir göstərmək üçün kifayət qədər səlahiyyətə malik deyil.
“Harada çalışmağımdan asılı olmayaraq, öz baxışlarıma uyğun hərəkət edəcəyəm, lakin hansısa dekorativ vəzifə tutmayacağam. Mən özümü sistem qura və nəticə əldə edə bilən menecer kimi görürəm”, – Fedorov bildirib.
O qeyd edib ki, nazirliyi olmayan baş nazir müavini faktiki olaraq sistemə tövsiyələr verən müşavir funksiyasını yerinə yetirir. Fedorovun fikrincə, belə bir vəzifədə komanda yaratmaq və koordinasiya etdiyi nazirliklərin fəaliyyətinə real təsir göstərmək çətin olardı.
Sabiq nazir, həmçinin müdafiə naziri vəzifəsinə qaytarılması ilə bağlı Prezident Zelenskiyə ultimatum verdiyi barədə iddiaları rədd edib. Onun sözlərinə görə, hökumətin istefasından sonra vəzifəsini tərk edib, daha sonra keçirilən etiraz aksiyaları və mətbuat brifinqindən sonra ona yeni vəzifələr təklif olunub.
Fedorov bildirib ki, Ukraynanın müdafiə sisteminin inkişafı ilə bağlı hazırladığı konsepsiyanı yalnız kifayət qədər geniş səlahiyyətlərə malik vəzifədə davam etdirə bilər. O, Zelenski ilə yekun söhbətin hələ baş tutmadığını və gələcək əməkdaşlıq imkanlarının tam bağlanmadığını da vurğulayıb.
Zelenski iyulun 23-də Fedorova bir neçə vəzifə təklif etdiyini, son variantın isə hərbi innovasiyalar üzrə baş nazir müavini postu olduğunu təsdiqləmişdi. “Reuters” yazıb ki, Fedorov əvvəlki postundan başqa hökumətdə təklif olunan vəzifələri qəbul etmək niyyətində olmadığını açıqlayıb.
