İran Xəzər dənizində ölkəyə məxsus ticarət gəmisinin vurulmasından sonra Ukraynadan dəymiş zərərin ödənilməsini tələb edib.
MSNews.az xəbər verir ki, İranın xarici işlər naziri Abbas Əraqçi bu tələbi ukraynalı həmkarı Andriy Sibiha ilə telefon danışığından sonra səsləndirib.
Əraqçinin sözlərinə görə, Ukrayna xarici işlər naziri onu hücumun qəsdən törədilmədiyinə və Kiyevin İranla gərginliyin artmasına çalışmadığına əmin edib.
“İran da eskalasiya istəmir. Lakin vətəndaşlarımıza və ya maraqlarımıza qarşı istənilən hücumun qəbuledilməz olduğunu açıq şəkildə bildirdim. Dəymiş zərər ödənilməlidir”, – deyə İranın xarici işlər naziri bildirib.
“Reuters” yazır ki, Andriy Sibiha Əraqçi ilə telefon danışığını açıq və səmimi adlandırıb. Ukrayna rəsmisi ölkəsinin hərəkətlərinin yalnız Rusiyanın təcavüzünə qarşı müdafiəyə yönəldiyini, mülki şəxslərin və mülki gəmilərin hədəf olmadığını vurğulayıb.
İranın məlumatına əsasən, iyulun 25-də Xəzər dənizində İran ticarət gəmisinə endirilən zərbə nəticəsində partlayış baş verib. Hadisə zamanı bir dənizçi həlak olub, daha bir nəfər yaralanıb. Tehran hücumu “düşmənçilik və cinayət aktı” adlandıraraq Ukraynanın İrandakı müvəqqəti işlər vəkilini Xarici İşlər Nazirliyinə çağırıb.
“Anadolu” agentliyinin məlumatına görə, Ukrayna qüvvələri İranla əlaqəli hərbi yüklərin daşınmasında iştirak etdiyi iddia edilən gəmiləri vurduqlarını açıqlayıblar. Lakin Kiyev hücuma məruz qalan konkret gəminin adını və onun daşıdığı yükün xarakterini rəsmi şəkildə açıqlamayıb.
Ukrayna Prezidenti Volodimir Zelenski daha əvvəl ölkə qüvvələrinin Xəzər dənizində Rusiya ilə İran arasında hərbi yüklərin daşınmasında istifadə edildiyi bildirilən gəmilərə zərbələr endirdiyini demişdi. İran isə Rusiyanın Ukraynaya qarşı müharibəsində iştirak etdiyini və Moskvaya silah tədarükünü davam etdirdiyini inkar edir.
Tərəflər gərginliyin daha da artmasında maraqlı olmadıqlarını bildirsələr də, təzminatın məbləği, ödəniş mexanizmi və hadisə ilə bağlı birgə araşdırmanın aparılıb-aparılmayacağı barədə məlumat verilməyib.
