Yəmənin şimalındakı Əl-Cəvf vilayətində husilərin “Ənsar Allah” hərəkatının silahlıları ilə yerli qəbilə döyüşçüləri arasında baş verən toqquşmalarda azı altı nəfər həlak olub.
MSNews.az xəbər verir ki, qarşıdurma Xab və əş-Şəaf rayonunun Əl-Yətəmə bölgəsində yerləşən Əl-Muhayr nəzarət-buraxılış məntəqəsində başlayıb. Qəbilə mənbələrinin məlumatına görə, husilər kəndlərinə qayıdan Əl-Cüəyd qəbiləsinin bir neçə üzvünü məntəqədə saxladıqdan sonra vəziyyət silahlı qarşıdurmaya çevrilib.
Bu barədə “Əl-Ərəbi əl-Cədid” məlumat yayıb.
Nəşrin məlumatına əsasən, Əl-Cüəyd qəbiləsinin üç üzvü öldürülüb, daha iki nəfər yaralanıb. Sonradan Dəhm qəbiləsinə mənsub silahlılar da qarşıdurmaya qoşularaq husilərin nəzarət məntəqələrinə hücum ediblər. İlkin məlumatlarda husilərin üç üzvünün öldüyü bildirilsə də, bəzi yerli mənbələr bu rəqəmin dörd olduğunu qeyd edir. Yekun itki sayı hələlik rəsmi şəkildə açıqlanmayıb.
“Ərəbi21” qəbilə döyüşçülərinin Əl-Muhayr məntəqəsini ələ keçirdiyini yazıb. Məlumata görə, yerli vasitəçilərin müdaxiləsindən sonra atışma dayanıb, lakin bölgədə gərginlik və tərəflərin silahlı hazırlığı davam edir.
Husilər qarşıdurmanın səbəbləri və itkilərin sayı barədə hələlik rəsmi açıqlama yaymayıblar. Buna görə sosial şəbəkələrdə döyüşlərin davam etməsi və tərəflərin itkiləri barədə yayılan müxtəlif rəqəmləri müstəqil şəkildə təsdiqləmək mümkün deyil.
Hadisədə iştirak edən Əl-Cüəyd və Dəhm qəbilə silahlılarının birbaşa Səudiyyə Ərəbistanı tərəfindən dəstəkləndiyi barədə iddia da etibarlı mənbələrdə təsdiqini tapmayıb. Söhbət əsasən husilərlə son həftələrdə münasibətləri gərginləşən yerli qəbilə birləşmələrindən gedir.
Əl-Cəvfdə qəbilələrlə husilər arasında gərginlik son həftələrdə artıb. “Əl-Cəzirə” yazır ki, qəbilə liderlərindən birinin saxlanılması və mülkiyyət mübahisəsi bölgədə husilərə qarşı səfərbərlik çağırışlarına səbəb olub. Vilayətin Məarib yaxınlığında və Səudiyyə Ərəbistanı sərhədində yerləşməsi qarşıdurmanın hərbi əhəmiyyətini artırır.
Son hadisə Yəməndə 2022-ci ildən davam edən nisbi sakitliyin pozulduğu dövrə təsadüf edir. “Reuters” tərəflərin Əl-Cəvf və digər cəbhələrə əlavə qüvvələr topladığını, Səudiyyə Ərəbistanının dəstəklədiyi beynəlxalq səviyyədə tanınmış Yəmən hökumətinin aviasiyasının isə husilərin raket və PUA obyektlərinə zərbələr endirdiyini bildirib.
