Finlandiyanın bəzi supermarketlərində subay insanların gündəlik alış-veriş zamanı bir-birini tanımasına kömək edən maraqlı üsul tətbiq olunur.
MSNews.az xəbər verir ki, mağazalarda adi səbətlərlə yanaşı, üzərində fin dilində “subaylar üçün səbət” mənasını verən “Sinkkukori” yazılmış çəhrayı səbətlər yerləşdirilib. Belə səbət götürən alıcı ətrafdakılara subay olduğunu və onunla söhbətə başlamağın mümkünlüyünü bildirir.
“Fox News” təşəbbüsü tanışlıq proqramlarına alternativ olan sadə və qeyri-rəsmi ünsiyyət vasitəsi kimi təqdim edib. Çəhrayı səbətdən istifadə tamamilə könüllüdür və həmin şəxsin mütləq romantik münasibət axtardığı anlamına gəlmir.
Mövzu sosial şəbəkələrdə yayılan videolardan sonra geniş diqqət çəkib. “NDTV” yazır ki, bu üsul insanlara xüsusi tanışlıq cümlələri işlətmədən, sadəcə seçdikləri səbət vasitəsilə ünsiyyətə açıq olduqlarını göstərməyə imkan verir.
“Delish” isə çəhrayı səbətlərin internetdə müsbət qarşılandığını, lakin təşəbbüsün real nəticələri və neçə insanın bu yolla tanış olduğu barədə hələ etibarlı statistikanın olmadığını qeyd edib.
Sosial şəbəkələrdə yayılan bəzi paylaşımlarda bu praktikanın Finlandiya üzrə bütün supermarketlərdə tətbiq edildiyi iddia olunsa da, açıq mənbələr söhbətin ölkənin bəzi mağazalarındakı təşəbbüsdən getdiyini göstərir.
Beləliklə, çəhrayı səbət daşıyan alıcı alış-veriş siyahısı ilə yanaşı, yeni tanışlıq ehtimalına da açıq olduğunu göstərmiş olur.
