Böyük Britaniyada həkimlər xərçəng xəstəliyi səbəbindən cinsiyyət orqanı tamamilə amputasiya edilmiş 40 yaşlı kişinin orqanını yenidən formalaşdırıblar. Doqquz saat davam edən mürəkkəb əməliyyat zamanı pasiyentin öz qolundan götürülən dəri, toxuma, sinir və qan damarlarından istifadə olunub.
MSNews.az xəbər verir ki, bu barədə “New York Post” məlumat yayıb. İngiltərənin Dadli şəhərində yaşayan Pol Lukasa 2022-ci ildə, 37 yaşında olarkən cinsiyyət orqanının xərçəngi diaqnozu qoyulub.
“Üzümü yastığın altında gizlədib ağlayırdım”, – deyə o, həmin günləri xatırlayıb.
2023-cü ilin iyulunda aparılan müayinələr zamanı xərçəng əlamətlərinin qalmadığı müəyyən edilib. Bundan sonra həkimlər ona rekonstruktiv əməliyyat təklif ediblər. Lakin cərrahi müdaxiləyə hazırlanmaq üçün Lukasın əvvəlcə xeyli çəki itirməsi tələb olunub.
2026-cı ilin martında Londonun “University College Hospital” xəstəxanasında doqquz saatlıq əməliyyat həyata keçirilib.
Cərrahlar pasiyentin sol bazuönü nahiyəsindən götürdükləri dəri və yumşaq toxumalar vasitəsilə yeni cinsiyyət orqanı formalaşdırıblar. Həmin nahiyədən götürülən sinirlər və arteriya qasıq bölgəsindəki müvafiq strukturlarla birləşdirilib, sidik kanalı isə ayrıca toxumalardan yaradılıb.
Tibbdə bu əməliyyat növü falloplastika adlanır. Avropa Urologiya Assosiasiyasının məlumatına görə, belə rekonstruksiya bir neçə mərhələdə həyata keçirilə bilər.
Əməliyyatdan sonra kişinin cinsiyyət orqanında hissiyyat tədricən bərpa olunmağa başlayıb. Lukas yeni yaranan hissləri kiçik elektrik impulslarına bənzədib.
O, həyat yoldaşı Nikki ilə artıq intim münasibətə qayıda bildiklərini də bildirib. Lukas bu təcrübəni olduqca emosional adlandırsa da, tam hissiyyatın bərpasının bir neçə il çəkə biləcəyini qeyd edib.
Rekonstruksiya prosesi hələ yekunlaşmayıb. 2027-ci ilin yaz və ya yay aylarında növbəti cərrahi müdaxilələrin keçirilməsi planlaşdırılır. Bu mərhələlərdə orqanın baş hissəsinin formalaşdırılması və ereksiyanı təmin edən xüsusi implantın yerləşdirilməsi nəzərdə tutulur.
Pol Lukas yaşadığı ağır prosesin həyat yoldaşı ilə münasibətlərini daha da gücləndirdiyini bildirib. O, oxşar xəstəliklə üzləşən kişiləri vaxtında tibbi yardım almağa və müalicədən sonra həyatlarını yenidən qurmaq ümidini itirməməyə çağırıb.
