Moldovanın Rusiyadakı səfiri Lilian Dariy iyulun 21-də Rusiya Xarici İşlər Nazirliyinə çağırılıb.
MSNews.az xəbər verir ki, Rusiya XİN səfirə Moldovadakı diplomatik nümayəndəliyin əməkdaşları və nəqliyyat vasitələri ilə bağlı iki hadisəyə görə etiraz bildirildiyini açıqlayıb.
Bu barədə “İnterfaks” məlumat yayıb.
Rusiya tərəfinin versiyasına görə, iyulun 19-da Kişinyovda Moldova polisi sənədlərin yoxlanılması məqsədilə Rusiya səfirliyinə məxsus avtobusu saxlayıb və səbəb göstərmədən nəqliyyat vasitəsinin diplomatik qeydiyyat nişanlarını çıxarıb. Açıqlamada polis əməkdaşlarının səfirlik işçilərinə qarşı güc tətbiq etdiyi və onları saxlamaqla hədələdiyi iddia olunur.
Rusiya XİN həmçinin səfirliyin vəziyyətə aydınlıq gətirilməsi üçün hadisə yerinə Moldova Xarici İşlər Nazirliyinin nümayəndəsinin göndərilməsi barədə müraciətinin cavabsız qaldığını bildirib. Bu iddialarla bağlı Moldova tərəfinin mövqeyi Rusiya qurumunun açıqlamasında yer almayıb.
Digər hadisənin iyulun 20-dən 21-nə keçən gecə Leuşen sərhəd-keçid məntəqəsində baş verdiyi bildirilir. Rusiya tərəfinin məlumatına əsasən, xidməti yükü Rusiyaya aparan səfirlik əməkdaşları sərhəddə dörd saatdan çox saxlanılıblar.
Rusiya XİN baş verənləri 1961-ci il Diplomatik əlaqələr haqqında Vyana Konvensiyasının müddəalarının pozulması kimi qiymətləndirib. Səfir Lilian Dariyə Moskvanın qarşılıqlı və analoji cavab tədbirləri görmək hüququnu özündə saxladığı bildirilib.
