Nikaraqua Prezidenti Daniel Orteqa ölkədə bundan sonra seçkilərin keçirilməyəcəyini açıqlayıb.
MSNews.az xəbər verir ki, Orteqa bu barədə 1979-cu il Sandinista inqilabının 47-ci ildönümünə həsr edilmiş mərasimdə çıxışı zamanı danışıb. O, seçkilərin müxalifət qüvvələrinin hakimiyyətə gəlməsi üçün vasitə olmasına artıq imkan verilməyəcəyini bildirib.
Məlumatı “Reuters” yayıb.
Orteqa çıxışında ABŞ tərəfindən dəstəkləndiyini iddia etdiyi siyasi qüvvələrin hökuməti ələ keçirməsinə imkan verilməyəcəyini söyləyib. Bununla belə, seçkilərin hansı hüquqi mexanizmlə dayandırılacağı, bunun üçün Konstitusiyaya və seçki qanunvericiliyinə hansı dəyişikliklərin ediləcəyi barədə məlumat verməyib.
Nikaraquada növbəti ümumi seçkilərin 2027-ci ilin noyabrında keçirilməsi nəzərdə tutulurdu. Orteqanın bəyanatı həmin seçkilərin baş tutmayacağı və hakimiyyətin seçki yolu ilə dəyişdirilməsi imkanının aradan qaldırılacağı anlamına gəlir. Lakin bununla bağlı hələlik ayrıca hüquqi aktın qəbul edildiyi açıqlanmayıb.
“Associated Press” yazır ki, Nikaraqua parlamenti 2025-ci ildə prezidentlik müddətini beş ildən altı ilə qaldıran və dövlət başçısının səlahiyyətlərini genişləndirən konstitusiya dəyişikliklərini təsdiqləyib. İslahat Orteqanın həyat yoldaşı Rozario Murilyoya da “birgə prezident” statusu verib.
Daniel Orteqa 1980-ci illərdə də ölkəyə rəhbərlik edib, 2007-ci ildən isə fasiləsiz hakimiyyətdədir. Son illərdə onun administrasiyası müxalif siyasətçilərin həbs edilməsi, müstəqil media və qeyri-hökumət təşkilatlarının fəaliyyətinin məhdudlaşdırılması ilə bağlı beynəlxalq tənqidlərlə üzləşib.
Müxalifət nümayəndələri və insan hüquqları təşkilatları Orteqanın açıqlamasını Nikaraquada demokratik hakimiyyət dəyişikliyi imkanlarının tamamilə aradan qaldırılması istiqamətində addım kimi qiymətləndiriblər.
