Ermənistanın sabiq prezidenti Serj Sarkisyanın müdafiə naziri olduğu dövrdə Gümrü şəhərində yerləşən “Sev Berd” — “Qara qala” tarixi abidəsinin özəlləşdirilməsi ilə bağlı cinayət işinin ibtidai istintaqı başa çatıb.
MSNews.az xəbər verir ki, Ermənistan İstintaq Komitəsinin məlumatına əsasən, iş ittiham aktı ilə birlikdə nəzarətçi prokurora təqdim edilib.
Bu barədə “Armenpress” məlumat yayıb.
İstintaqın versiyasına görə, Serj Sarkisyan 11 may 2005-ci ildə müdafiə naziri vəzifəsində çalışarkən respublika əhəmiyyətli tarix və mədəniyyət abidəsi olan qalanı birbaşa satış yolu ilə fiziki şəxsə verib.
Alqı-satqı müqaviləsinin dəyəri 22 milyon 951 min 500 Ermənistan dramı olub. Satışa 626,45 kvadratmetr sahəsi olan qala və onun istifadəsi üçün nəzərdə tutulmuş 0,7 hektarlıq torpaq sahəsi daxil edilib. İstintaq Komitəsi əməliyyatın Ermənistan hökumətinin qərarlarından irəli gəlmədiyini və həmin qərarlarda nəzərdə tutulmadığını bildirir.
İstintaq orqanının qənaətinə görə, əməliyyat nəticəsində dövlət respublika əhəmiyyətli tarixi-mədəni abidə üzərində mülkiyyət hüququnu itirib. Qala 2007-ci ildə dövlətə məxsus və özgəninkiləşdirilməsi qadağan edilən daşınmaz tarix və mədəniyyət abidələrinin siyahısına da daxil edilməyib.
Nəzarətçi prokurorun qərarı ilə Sarkisyana qarşı Ermənistan Cinayət Məcəlləsinin 441-ci maddəsinin 2-ci hissəsinin 5-ci bəndi üzrə cinayət təqibi başlanıb. Maddə vəzifəli şəxsin səlahiyyətlərindən sui-istifadə etməsi və ya səlahiyyət həddini aşması nəticəsində ehtiyatsızlıqdan ağır nəticələrin yaranmasını nəzərdə tutur.
Ermənistan Baş Prokurorluğunun daha əvvəl yaydığı məlumata görə, qala 1995-ci ildə Müdafiə Nazirliyinin balansına verilib, 2004-cü ildə isə Şirak vilayətinin tarixi və mədəni abidələr siyahısına daxil edilib. 2005-ci ildə qala Tiqran Petrosyan adlı şəxsə satılıb, o isə əmlakı 2012-ci ildə Gümrünün keçmiş meri Samvel Balasanyana verib.
“Sev Berd” və onun ətrafındakı torpaqların sonrakı özgəninkiləşdirilməsi ilə bağlı Samvel Balasanyan və başqa şəxslər barəsində də ayrıca cinayət təqibləri başlanıb. Ermənistan İstintaq Komitəsi həmin işlərdə vəzifə səlahiyyətlərindən sui-istifadə, vəzifə saxtakarlığı və çirkli pulların yuyulması ittihamlarının irəli sürüldüyünü açıqlayıb.
