Çin Xalq Respublikasının Sədri Si Cinpin iyunun 8-9-da Şimali Koreyaya dövlət səfəri edəcək.
MSNews.az xəbər verir ki, “Xinhua” agentliyinin məlumatına görə, səfər Şimali Koreya lideri Kim Çen Inın dəvəti ilə baş tutacaq. Çin Kommunist Partiyası Mərkəzi Komitəsinin Beynəlxalq əlaqələr departamentinin sözçüsü Si Cinpinin Koreya Xalq Demokratik Respublikasına dövlət səfəri edəcəyini açıqlayıb.
“Yonhap” da Şimali Koreyanın dövlət mediası “KCNA”ya istinadən Si Cinpinin iyunun 8-9-da Pxenyana səfər edəcəyini yazıb. Məlumata görə, səfər Kim Çen Inın dəvəti əsasında keçiriləcək.
Bu, Si Cinpinin 2019-cu ildən bəri Şimali Koreyaya ilk səfəri olacaq. “Reuters”in məlumatına görə, səfər həm də Çin liderinin 2026-cı ildə ilk xarici səfəri kimi qiymətləndirilir.
“Xinhua” yazır ki, Çin Xarici İşlər Nazirliyinin sözçüsü Mao Nin səfər zamanı tərəflərin ikitərəfli münasibətlər və qarşılıqlı maraq doğuran məsələlər ətrafında fikir mübadiləsi aparacağını bildirib. Onun sözlərinə görə, bu il Çin və Şimali Koreya arasında Dostluq, Əməkdaşlıq və Qarşılıqlı Yardım Müqaviləsinin imzalanmasının 65-ci ildönümüdür.
Pekin səfəri iki ölkə arasında ənənəvi əlaqələrin inkişafı və regionda sülh, sabitlik və rifaha töhfə kimi təqdim edir. Çin və Şimali Koreya uzun illərdir siyasi və strateji müttəfiq hesab olunur.
Bununla belə, səfər həssas regional proseslər fonunda baş tutur. “Reuters” yazır ki, Pekin Pxenyanla əlaqələri gücləndirməyə çalışır, çünki Şimali Koreyanın Rusiya ilə münasibətləri son dövrdə daha da dərinləşib.
“Associated Press”in məlumatına görə, Şimali Koreya BMT sanksiyaları altında qalmasına baxmayaraq nüvə silahı proqramını genişləndirməyə davam edir. Agentlik qeyd edir ki, Pxenyanın Moskva ilə yaxınlaşması, Ukrayna müharibəsi fonunda Rusiya ilə əməkdaşlığın artması və nüvə proqramı ətrafında gərginlik səfərə əlavə siyasi çəki qazandırır.
Ekspertlər hesab edirlər ki, Si Cinpinin səfəri Pekinin Koreya yarımadasındakı təsirini qorumaq və Şimali Koreya ilə münasibətlərdə əsas tərəfdaş statusunu yenidən vurğulamaq məqsədi daşıyır. “Reuters”in qiymətləndirməsinə görə, Çin bu səfərlə Pxenyan-Moskva yaxınlaşması fonunda regiondakı diplomatik rolunu gücləndirməyə çalışır.
Səfər zamanı hansı konkret razılaşmaların əldə olunacağı hələlik açıqlanmayıb. Lakin Pekin və Pxenyanın siyasi əlaqələr, iqtisadi əməkdaşlıq, regional təhlükəsizlik və Koreya yarımadasında vəziyyətlə bağlı müzakirələr aparacağı gözlənilir.
