İsrailin Baş naziri Benyamin Netanyahu yəhudi tarixində Makkaveylər üsyanına istinad edərək İsrailin hazırkı müharibəsini “sivilizasiyanın müdafiəsi” kimi təqdim edib. Netanyahu bildirib ki, əgər Makkaveylər məğlub olsaydı, “yəhudi-xristian sivilizasiyası” və ABŞ mövcud olmazdı. Bu fikirlər onun Qərb divarında keçirilən Hanuka mərasimindəki çıxışı zamanı səslənib.
MSNews.az “JNS” nəşrinə istinadən xəbər verir.
Netanyahu çıxışında Makkaveylərin mübarizəsini bugünkü İsrail ordusunun əməliyyatları ilə müqayisə edib. Onun sözlərinə görə, İsrail qüvvələri Qəzzada, Livanda, İranda və “harada lazım gələrsə” təkcə yəhudi xalqını və İsrail dövlətini deyil, həm də “sivilizasiyanı barbarlardan qorumaq” üçün döyüşür.
İsrail Baş naziri bildirib ki, Makkaveylər yəhudi xalqının və yəhudi inancının qorunmasında həlledici rol oynayıblar. Onun məntiqinə görə, iudaizmin qorunması sonradan xristianlığın və Qərb sivilizasiyasının formalaşması üçün tarixi əsas yaradıb. Netanyahu bu fikri ABŞ-ın İsraildəki səfiri Mayk Hakabiyə müraciətlə “Makkaveylər məğlub olsaydı, Hakabilər də olmazdı” sözləri ilə ifadə edib.
Netanyahu daha əvvəl ingilisdilli mətbuat konfransında da İsrailin müharibəsini “barbarlara qarşı sivilizasiyanın mübarizəsi” kimi təqdim etmişdi. O bildirmişdi ki, demokratik ölkələr “barbarlardan daha güclü” olmalıdır, əks halda onlar “qapıları qırıb cəmiyyətləri məhv edəcəklər”.
Netanyahunun bu ritorikası Fələstin tərəfdarı çevrələr və jurnalistlər tərəfindən sərt tənqid olunur. Tənqidçilər hesab edirlər ki, İsrail Baş nazirinin “sivilizasiya” və “barbarlıq” üzərindən qurduğu siyasi dil Qəzza, Livan və regiondakı hərbi əməliyyatlara ideoloji əsas yaratmaq məqsədi daşıyır. İsrail tərəfi isə bu yanaşmanı 7 oktyabr hücumlarından sonra təhlükəsizlik və özünümüdafiə konsepsiyası ilə əsaslandırır.
