Rusiya prezidenti Vladimir Putin və ABŞ prezidenti Donald Tramp arasında 90 dəqiqədən çox davam edən telefon danışığında Ukraynadakı müharibə, mümkün qısamüddətli atəşkəs və İran ətrafındakı vəziyyət müzakirə olunub. Kremlin açıqlamasına görə, Putin 9 May — Qələbə Günü ilə bağlı dövrdə Ukraynada müvəqqəti atəşkəs elan etməyə hazır olduğunu bildirib.
“Reuters” yazır ki, Tramp da söhbətdən sonra Ukraynada mümkün atəşkəs məsələsini Putinlə müzakirə etdiyini təsdiqləyib.
Prezidentin köməkçisi Yuri Uşakovun sözlərinə görə, danışıq “dostyana və işgüzar” şəraitdə keçib. O bildirib ki, Tramp Ukrayna müharibəsinin dayandırılması üçün razılaşmanın “artıq yaxın” olduğunu deyib, Putin isə Rusiyanın “xüsusi hərbi əməliyyat” adlandırdığı müharibədə qarşıya qoyulan məqsədlərə nail olunacağını təkrarlayıb.
Lakin tərəflərin atəşkəs təşəbbüsünü təqdim etmə forması fərqlənib. Kremlin versiyasına görə, Putin Qələbə Günü ilə bağlı müvəqqəti atəşkəsə hazır olduğunu bildirib və Tramp bunu müsbət qarşılayıb. Tramp isə Ağ Evdə jurnalistlərə açıqlamasında qısamüddətli atəşkəs ideyasını özünün təklif etdiyini deyib. O, “kiçik bir atəşkəs” istədiyini və Putinin bunu edə biləcəyini düşündüyünü bildirib.
Telefon danışığında İran mövzusu da ayrıca yer alıb. Trampın sözlərinə görə, Putin İranın zənginləşdirilmiş uranı məsələsində kömək təklif edib, lakin ABŞ prezidenti ona Ukraynadakı müharibənin dayandırılmasına diqqət yetirməyi üstün tutduğunu deyib. Kremlin açıqlamasında isə Putin ABŞ və İsrailin İrana qarşı mümkün yeni hərbi addımlarının təhlükəli nəticələr doğura biləcəyini bildirib.
Mətbuat konfransı zamanı Trampın Ukrayna ilə İranı qarışdırdığı görüntüsü də diqqət çəkib. O, jurnalistin münaqişələrlə bağlı sualına cavab verərkən Ukraynanın “hərbi baxımdan məğlub olduğunu” deyib və “159 gəminin hamısının suyun altında olduğunu” bildirib. “The Guardian” və “Times of Israel” bu ifadənin böyük ehtimalla İrana aid əvvəlki açıqlamalarla qarışdırıldığını yazıb.
Mümkün 9 May atəşkəsinin real nəticə verib-verməyəcəyi isə hələlik qeyri-müəyyəndir. “Reuters” xatırladır ki, Putin ötən il də oxşar qısamüddətli atəşkəs elan etmişdi, lakin həmin təşəbbüs Kiyevlə razılaşdırılmamışdı. Ukrayna tərəfi Moskvanın qısamüddətli atəşkəs təkliflərinə ehtiyatla yanaşır və Rusiyanı belə fasilələrdən yenidən qruplaşmaq üçün istifadə etməkdə ittiham edir.
