“Xiaomi” səyahət və kampinq həvəskarları üçün xüsusi hazırlanmış “SkyNomad N90 Max Explorer Edition” modelini təqdim edib. Zavoddan elektriklə qalxan dam sistemi ilə təchiz edilən avtomobil bir neçə saniyə ərzində yaşayış və istirahət məkanına çevrilə bilir.
MSNews.az xəbər verir ki, model sentyabrın 7-də Çində rəsmi olaraq satışa çıxarılıb. “Xiaomi EV” məlumatına görə, “Explorer Edition” beş yerlik salon quruluşuna malikdir və qiyməti 299 900 yuandan başlayır.
Modelin əsas xüsusiyyəti kuzova zavod səviyyəsində inteqrasiya edilmiş elektrikli qaldırılan damdır. Dam açıldıqda avtomobilin salonunda maksimum şaquli hündürlük 2,294 metrə çatır. İkinci səviyyədə isə 2110×985 mm ölçülü ayrıca istifadə sahəsi yaranır və konstruksiya maksimum 200 kiloqram yük daşıya bilir.
“Xiaomi” bildirir ki, yuxarı hissədə beş torlu pəncərə vasitəsilə təxminən 1,7 kvadratmetr işıqlanma sahəsi, ayrıca işıqlandırma, kondisioner çıxışları və USB Type-C enerji portu mövcuddur. Damın qaldırılması yalnız avtomobil dayanmış vəziyyətdə və ictimai yollardan kənarda mümkündür.
Salon da kampinq üçün yenidən qurulub. İkinci sıra oturacaqları təxminən 30 saniyəyə 1,87×1,24 metrlik düz çarpayıya çevirmək mümkündür. Sistem səsli əmrlə və ya bir düymə vasitəsilə idarə edilir. Oturacaqlarda isitmə və ventilyasiya funksiyaları da var.
Avtomobilin ən qeyri-adi funksiyalarından biri isə döşəmənin isitmə sistemidir. Üç səviyyəli isitmə rejimində döşəmənin temperaturu 38 dərəcəyə qədər yüksələ bilir. “Xiaomi”nin məlumatına görə, sıfır dərəcə temperaturda sistem döşəmə səthini 10 dəqiqə ərzində təxminən 25 dərəcəyə qədər qızdıra bilir. Salonda həmçinin 1,7 kvadratmetrlik ağac teksturalı alüminium döşəmə, 20 litrlik saxlama bölmələri, yataqyanı modul və 30 düymlük proyeksiya sistemi nəzərdə tutulub.
“CarNewsChina” yazır ki, “N90 Max Explorer Edition” məsafə artırıcı kimi çalışan 1,5 litrlik turbomühərrik, 76 kVt/saatlıq batareya və iki elektrik mühərriki ilə təchiz edilib. Avtomobilin rəsmi Çin bazarı qiyməti 299 900 yuan, təxminən 44 min ABŞ dolları səviyyəsindədir.
“TechNode” isə “Explorer Edition”ın standart yeddi yerlik N90 Max-dan fərqli olaraq məhz kampinq və uzunmüddətli səyahətlər üçün beş yerlik formada hazırlandığını qeyd edir.
