ABŞ Prezidenti Donald Trampın terrorla mübarizə üzrə müşaviri Sebastian Qorka Quranın yalnız dini mətn kimi nəzərdən keçirilməməli olduğunu bildirib. O, müsahibəsində müqəddəs kitabın siyasi və hərbi-strateji məzmun daşıdığına dair öz mövqeyini ifadə edib.
MSNews.az xəbər verir ki, Qorka bu fikirləri sentyabrın 17-də yayımlanan “The Andrew Klavan Show” proqramına müsahibəsində səsləndirib.
Qorka Məhəmməd Peyğəmbərin (s.ə.s.) dini rəhbər olmaqla yanaşı, siyasi və hərbi rəhbər kimi də fəaliyyət göstərdiyini bildirib. O, bu yanaşmasını izah edərkən Quran haqqında belə deyib:
“Əgər siz ilkin təlimlərə hərfi şəkildə bağlısınızsa, Quran sadəcə cümə günü oxuduğunuz mətn deyil. O, dini, siyasi və hərbi strateqin mətnidir”.
Müşavir daha sonra din və dövlətin ayrılması məsələsinə toxunaraq bu prinsipin İslamın ilkin mətnlərinə xas olmadığına dair fikrini bildirib. Qorka eyni müsahibədə müsəlmanlarla uzun illər çalışdığını, onların arasında tələbələri və təhlükəsizlik sahəsində əməkdaşlıq etdiyi şəxslərin olduğunu da qeyd edib.
Qeyd edək ki, Qorkanın sözləri Quran və İslam tarixi haqqında onun şəxsi şərhidir. Videoda səslənən fikir bütün müsəlmanların dini və siyasi baxışlarını ifadə edən ümumi mövqe kimi təqdim edilməməlidir.
