ABŞ Prezidenti Donald Tramp sentyabrın 18-də Rusiyaya qarşı iqtisadi təzyiqi əhəmiyyətli dərəcədə artıran yeni sanksiyalar qanununu imzalayıb. Sənəd Vaşinqtona Rusiyanın enerji və müdafiə sektorlarına qarşı əlavə məhdudiyyətlər tətbiq etmək, həmçinin Rusiya nefti və qazının iri alıcılarına 100%-dək gömrük rüsumu müəyyənləşdirmək üçün geniş səlahiyyətlər verir.
MSNews.az xəbər verir ki, bu barədə “Reuters” məlumat yayıb. Ağ Evin açıqlamasına əsasən, Donald Trampın imzaladığı sənəd “Lindsey O. Graham Sanctioning Russia and Iran Act of 2026” adlanır. Qanun Rusiyaya qarşı mövcud sanksiyaları genişləndirməklə yanaşı, İrana tətbiq edilən bir sıra məhdudiyyətlərin müddətini də uzadır.
Yeni sanksiyaların əsas hədəfləri Rusiyanın neft-qaz və müdafiə sektorları, bankları, yüksəkvəzifəli rəsmiləri, eləcə də sanksiyalardan yayınmaq üçün istifadə olunan tankerlərdən ibarət “kölgə donanması”dır. Məqsəd Moskvanın enerji ixracından əldə etdiyi gəlirləri azaltmaq və Ukraynada müharibəni maliyyələşdirmək imkanlarını məhdudlaşdırmaqdır.
Qanunun ən mühüm müddəalarından biri Rusiya enerji resurslarını alan üçüncü ölkələrə aiddir. Sənəd Rusiya nefti və təbii qazının beş ən böyük alıcısından ABŞ-yə idxal olunan məhsullara 100%-dək tarif tətbiq edilməsini nəzərdə tutur. Bu mexanizm xüsusilə Çin və Hindistana təsir göstərə bilər. “Associated Press” bildirir ki, qanunda müəyyən ölkələr üçün istisnalar da nəzərdə tutulub.
Bununla belə, 100%-lik tariflərin bütün ölkələrə avtomatik və eyni qaydada tətbiqi nəzərdə tutulmur. Qanun ABŞ prezidentinə tədbirlərin icrası, tarif dərəcələrinin müəyyənləşdirilməsi və müəyyən hallarda məhdudiyyətlərdən azadolma ilə bağlı geniş səlahiyyətlər verir.
Sənəd ABŞ Konqresinin hər iki palatasında qəbul edilib. Senat qanun layihəsini 86 lehinə, 11 əleyhinə, Nümayəndələr Palatası isə 262 lehinə, 159 əleyhinə səslə təsdiqləyib.
Yeni qanunla Vaşinqtonun iqtisadi təzyiq mexanizmləri yalnız Rusiyaya qarşı birbaşa sanksiyalarla məhdudlaşmır. Rusiya ilə enerji ticarətini davam etdirən və ya Moskvaya sanksiyalardan yayınmaqda kömək edən üçüncü ölkələr də əlavə iqtisadi məhdudiyyətlərlə üzləşə bilər.
