İtaliya Baş Naziri Corcia Meloni Ukrayna Prezidenti Vladimir Zelenskini ölkədəki münaqişənin həlli üçün “ağrılı güzəştlər” etməyə razı salmaq üçün 90 dəqiqəlik danışıqlar aparıb. Bu barədə “Corriere della Sera” qəzeti məlumat verib.
Qəzet qeyd edir ki, görüş gərgin və qarşılıqlı fikir ziddiyyətləri ilə dolu olub. Görüşdə İtaliyanın müdafiə naziri Guido Crosetto və xarici işlər naziri Antonio Tajani də iştirak edib.
İtaliya Baş Naziri tərəfindən danışıqların açıq və birbaşa olduğu, mesajın isə belə olduğu vurğulanıb: “Diqqət edin, bəlkə də bəzi ağrılı güzəştlər etməli olacaqsınız.”
Zelenski isə öz növbəsində Melonini ABŞ Prezidenti Donald Trampla bağlı mövqeyini yumşaltmağa inandırmağa çalışıb. Qeyd olunur ki, Vaşinqton sülh sazişinin tez imzalanmasına çalışır və bu, Kiyevin maraqlarını tam əhatə etmir.
Paralel olaraq, Ukrayna İtaliyaya bir sıra tələblərini təqdim edib. Bunlara Romanın dondurulmuş Rusiya aktivlərinin müsadirəsində aktiv iştirakı və Kiyev üçün silah alqı-satqısı proqramına qoşulması daxildir.
