ABŞ prezidenti Donald Tramp İranla mümkün sülh razılaşmasına dair anlaşma memorandumunun “böyük ölçüdə razılaşdırıldığını” bildirib. Onun sözlərinə görə, sənəd ABŞ, İran və bir sıra regional ölkələr tərəfindən yekun təsdiq mərhələsindədir. Tramp razılaşmanın əsas elementlərindən birinin Hörmüz boğazının açılması olduğunu açıqlayıb.
MSNews.az xəbəri “Reuters”-ə istinadən təqdim edir.
Tramp sosial şəbəkədə yazıb ki, Səudiyyə Ərəbistanı, Birləşmiş Ərəb Əmirlikləri, Qətər, Türkiyə, Misir, Pakistan, İordaniya və Bəhreyn liderləri ilə İran və “sülhə dair anlaşma memorandumu” üzrə telefon danışığı aparıb. ABŞ prezidenti həmçinin İsrailin baş naziri Benyamin Netanyahu ilə ayrıca danışdığını, sazişin yekun detalları üzərində işin davam etdiyini bildirib.
Nəşr yazır ki, Tramp razılaşmanın digər şərtlərini açıqlamayıb və yekun detalların yaxın vaxtlarda elan olunacağını qeyd edib. Agentliyin məlumatına görə, Pakistan vasitəçilik prosesində mühüm rol oynayır və müzakirələr İranla müharibəyə son qoyulması, Hörmüz boğazı ilə bağlı böhranın həlli və daha geniş razılaşma üçün danışıqların başlanmasını nəzərdə tutur.
Bununla belə, Tehran tərəfinin mövqeyi tam yekunlaşmış görünmür. İranın “Fars” agentliyi Trampın sazişin demək olar ki, hazır olması barədə fikirlərini “reallıqla uyğun gəlməyən” açıqlama kimi təqdim edib. İran rəsmiləri isə boğaz üzərində nəzarət, ABŞ blokadasının dayandırılması və neft satışlarına tətbiq edilən sanksiyaların ləğvini tələb edir.
Səudiyyə mətbuatı da telefon danışığını təsdiqləyib. “Saudi Gazette” yazır ki, Səudiyyə Ərəbistanının vəliəhdi Məhəmməd bin Salman ABŞ prezidenti Donald Tramp və bir sıra ərəb-müsəlman ölkələrinin liderləri ilə birgə telefon danışığında iştirak edib. Danışıqlarda regional gərginliyin azaldılması, Pakistan və Qətərin vasitəçilik səyləri müzakirə olunub.
