Qara dənizdə limanlara və yük gəmilərinə hücumlar Rusiyanı taxıl ixracı üçün alternativ marşrutları genişləndirməyə sövq edib. Rusiya şirkətləri Baltik dənizindəki Ust-Luqa və Arktika bölgəsindəki Murmansk limanlarında əvvəllər digər yüklər üçün istifadə olunan terminalları taxıl daşımalarına uyğunlaşdırırlar.
MSNews.az xəbər verir ki, bu barədə sentyabrın 21-də “Reuters” agentliyi nəqliyyat və taxıl sektorundakı beş mənbəyə istinadən məlumat yayıb.
Əvvəlki ixrac mövsümündə Rusiyanın dəniz yolu ilə daşınan taxılının təxminən 90 faizi Qara dəniz limanlarından göndərilib. Son aylarda Rusiya və Ukraynanın qarşılıqlı hücumları isə hər iki ölkənin limanlarından taxıl daşımalarına ciddi maneələr yaradıb.
Alternativ marşrutlardan biri Leninqrad vilayətindəki Ust-Luqa limanıdır. Burada əsasən mineral gübrələrin daşınması ilə məşğul olan və illik 37 milyon ton yükötürmə gücünə malik “Ultramar” terminalı avqust ayından taxıl qəbul etməyə başlayıb. Sentyabrda terminala dəmir yolu ilə təxminən 260 min ton taxıl çatdırılması üçün müraciətlər daxil olub. Bu yüklərin Misir və Səudiyyə Ərəbistanına göndərilməsi nəzərdə tutulur.
Murmansk limanında da taxıl daşımaları üçün hazırlıq görülür. “Reuters”-in mənbələrinə görə, “Rusiya Dəmir Yolları” Stavropol diyarından Murmanska ilk 40 min ton taxılın daşınmasını təsdiqləyib. Bu, həmin həcmdə taxılın artıq xaricə ixrac olunduğu anlamına gəlmir.
Qara dənizdəki hücumlar Ukraynanın ixracına da təsir göstərir. Sentyabrın 17-də Odessa vilayətində taxılın Dunay limanlarına daşınması üçün mühüm əhəmiyyət daşıyan körpünün zədələnməsi dəmir yolu ilə yükdaşımaları çətinləşdirib. Ukrayna tərəfi yüklərin bir hissəsini Moldova üzərindən alternativ marşrutlarla çatdırmaq imkanlarını nəzərdən keçirir.
Rusiyanın bütün taxıl ixracı Qara dənizdən çıxarılmayıb. Hazırda Baltik və Arktika limanlarında görülən tədbirlər əsas marşrutda yaranan fasilələr fonunda daşımaların bir hissəsini alternativ istiqamətlərə yönəltməyə hesablanıb.
