Rusiya Ukrayna müharibəsinin təsirləri fonunda dərinləşən əmək çatışmazlığını aradan qaldırmaq üçün Hindistandan işçi qüvvəsi cəlb etməyə başlayıb.
Rəsmi məlumatlara görə, ölkəyə hazırda ən azı 2,3 milyon işçi lazımdır və bu boşluğu doldurmaq üçün Moskva ənənəvi mənbə sayılan Mərkəzi Asiya ölkələrindən kənara çıxaraq Hindistana üz tutur.
Rusiya 2021-ci ildə – Ukraynaya hərbi müdaxilədən bir il əvvəl – hindistanlı vətəndaşlar üçün təxminən 5 min iş icazəsi təsdiqləmişdi. Lakin ötən il bu rəqəm kəskin artaraq 72 minə yaxınlaşıb və bu, miqrant işçilər üçün ayrılan illik vizaların demək olar ki, üçdə birini təşkil edib.
Moskva yaxınlığındakı Balaşixa şəhərində yerləşən tekstil fabrikində çalışan 23 yaşlı Qaurav Rusiyada üç aydır işlədiyini deyib. Onun sözlərinə görə, Hindistanda gəlir imkanları məhduddur, Rusiyada isə maaş daha yüksəkdir. Digər hindistanlı işçilər də əsasən tekstil, kənd təsərrüfatı, tikinti və tullantıların idarə olunması sahələrində çalışırlar.
Rusiya hökuməti bildirir ki, ölkədə 800 min nəfər istehsal sektorunda, 1,5 milyon nəfər isə xidmət və tikinti sahələrində tələb olunur. Rusiya baş nazirinin birinci müavini Denis Manturov ölkənin “məhdudiyyətsiz sayda” hindistanlı işçi qəbul edə biləcəyini açıqlayıb.
Ekspertlər qeyd edirlər ki, rublun zəifləməsi, miqrasiya qanunlarının sərtləşdirilməsi və anti-miqrant ritorikanın artması səbəbindən Mərkəzi Asiyadan gələn işçilərin sayı azalıb. Halbuki bu region ölkələri uzun illər Rusiya üçün əsas əmək mənbəyi olub.
Bu proses Moskva ilə Yeni Dehli arasında güclü iqtisadi və müdafiə əlaqələrinin fonunda baş verir. Vladimir Putin və Narendra Modi ötən ilin dekabrında hindistanlıların Rusiyada işləməsini asanlaşdıran razılaşma imzalayıblar. Hindistan, Qərb sanksiyaları səbəbindən alternativ bazar axtaran Rusiyadan güzəştli neft alışını da artırmışdı.
Bununla belə, ABŞ-nin Hindistana Rusiya neftinin alışını azaltmaqla bağlı təzyiqləri vəziyyətə təsir göstərə bilər. ABŞ Prezidenti Donald Tramp bu məsələni ABŞ-Hindistan ticarət razılaşması ilə əlaqələndirib.
Hazırda isə Rusiya üçün prioritet məsələ iqtisadiyyatın və müharibə fonunda formalaşan istehsal tələbatının təmin olunmasıdır. Hindistandan gələn minlərlə işçi bu boşluğu qismən doldurmağa kömək edir.
