Rusiya dronu sentyabrın 13-də Ukraynanın Polşa ilə sərhədində, NATO ərazisindən cəmi təxminən 2 kilometr məsafədə Kiyev–Varşava marşrutu üzrə sərnişin qatarının lokomotivini vurub. Hücumdan qısa müddət əvvəl həmin dəmir yolu xəttindən Böyük Britaniyanın keçmiş baş naziri Boris Conson və yüksək səviyyəli Avropa rəsmilərini daşıyan diplomatik qatar keçib. (Reuters)
MSNews.az xəbər verir ki, “Reuters” Ukrayna Dəmir Yollarına istinadən yazır ki, hücum Yahodın–Dorohusk sərhəd-keçid məntəqəsinin yaxınlığında baş verib. Dron sərnişin vaqonlarına deyil, lokomotivə zərbə endirib və hadisə nəticəsində ölən və ya yaralanan olmayıb.
“Associated Press” bildirir ki, Ukrayna dəmir yolu dispetçerləri yaxınlaşan dronu əvvəlcədən aşkar etdikləri üçün sərnişinlər təxliyə edilib. Qatarın göyərtəsində 200-dən çox sərnişin olub və vaxtında görülən təhlükəsizlik tədbirləri itkinin qarşısını alıb.
Hücumdan bir qədər əvvəl Yahodın stansiyasından xüsusi diplomatik qatar planlaşdırılandan tez ayrılıb. Onun göyərtəsində Boris Conson, İsveçin keçmiş baş naziri Karl Bildt, Almaniya kansleri Fridrix Mertsin xarici siyasət və təhlükəsizlik üzrə müşaviri Günter Zautter, eləcə də bir sıra Avropa ölkələrinin təhlükəsizlik rəsmiləri olub.
“Anadolu Agentliyi” “Der Spiegel”ə istinadən yazır ki, qatarda Britaniya, Fransa və İtaliyanın təhlükəsizlik müşavirləri, Almaniya parlamentinin üzvləri, diplomatlar və alimlər də olub. Qrup Kiyevdə Ukrayna hakimiyyəti ilə mümkün sülh danışıqlarını müzakirə edib və Yalta European Strategy — YES konfransında iştirak etdikdən sonra Polşaya qayıdırdı.
Həmin konfrans çərçivəsində Ukrayna Prezident Ofisinin rəhbəri Kirill Budanov Almaniyanın Günter Zautter, Fransanın Emmanuel Bonn, İtaliyanın Fabrizio Saggio və Böyük Britaniyanın Conatan Pauell daxil olmaqla təhlükəsizlik müşavirləri ilə mümkün yeni sülh danışıqlarını müzakirə etmişdi. “Ukrinform” görüşlərin mümkün üçtərəfli danışıqların oktyabrda keçirilməsi perspektivinə həsr olunduğunu yazır.
Ukrayna Dəmir Yollarının məlumatına görə, diplomatik qatar təhlükə səbəbindən cədvəldən əvvəl hərəkətə başlayıb. Şirkət bildirib ki, Rusiya dronunun əsl hədəfinin məhz bu qatar olması “tamamilə mümkün”dür. Lakin bu, Ukrayna tərəfinin qiymətləndirməsidir və hücumun konkret olaraq Avropa rəsmilərini hədəf aldığını sübut edən müstəqil dəlil açıqlanmayıb.
Karl Bildt hadisədən sonra bildirib ki, vurulan qatar onların qatarı deyil, onlardan bir neçə dəqiqə sonra eyni sərhəd xəttindən keçən qatar olub. Onların öz qatarında isə dron təhlükəsi səbəbindən təxliyəyə hazırlıq elan edilib.
Maraqlı digər detal isə ABŞ Mərkəzi Kəşfiyyat İdarəsinin keçmiş direktoru Devid Petreusun həmin vaxt Yahodın stansiyasında olan başqa bir qatarda olmasıdır. Ukrayna Dəmir Yollarının məlumatına görə, həmin qatar da hücum zamanı ərazidə olub.
Rusiya Müdafiə Nazirliyi həmin gün Ukraynanın qərbində Avropadan hərbi yüklərin daşınmasında istifadə edildiyini iddia etdiyi dəmir yolu infrastrukturunu vurduğunu açıqlayıb. Bununla belə, Moskva diplomatik qatarı və ya Boris Consonu hədəf aldığını bildirməyib.
Eyni səhər Ukrayna–Polşa sərhədindən bir kilometrdən az məsafədə yük avtomobili və digər infrastruktur da dron hücumuna məruz qalıb, nəticədə Yahodın–Dorohusk keçid məntəqəsinin fəaliyyəti müvəqqəti dayandırılıb. Polşanın xarici işlər naziri Radoslav Sikorski Rusiya zərbələrinin NATO sərhədlərinə yaxınlaşmasını “eskalasiya” adlandırıb. (Reuters)
Fransanın xarici işlər naziri Jan-Noel Barro isə sentyabrın 14-də bildirib ki, sərhəd yaxınlığındakı zərbələrin məqsədi avropalıları qorxutmaq və parçalamaqdır.
