Rusiyalı millətçi yazıçı və Ukraynaya qarşı müharibənin açıq tərəfdarlarından olan Zaxar Prilepin Rusiya imperiyasının bərpasını müdafiə edərək, Ukraynadan başqa keçmiş Rusiya imperiyası və SSRİ-yə daxil olmuş bəzi ərazilərin də Rusiyaya “qayıtmalı” olduğunu bildirib.
MSNews.az xəbər verir ki, Prilepin bu fikirləri Moskva Beynəlxalq Kitab Sərgisində çıxışı zamanı səsləndirib. Onun çıxışından yayılan videonun məzmunu Rusiya mediasında da təsdiqlənib.
“Reportyorı” nəşrinin təqdim etdiyi sitata görə, Prilepin deyib:
“İmperiyanın bərpasının tərəfdarıyam. Təkcə Ukraynanın deyil, keçmiş Rusiya imperiyası və Sovet İttifaqının əcdadlarımızın fəth etdiyi bir sıra digər ərazilərinin də geri qaytarılmasının tərəfdarıyam”.
Prilepin daha sonra Rusiyanın Ukraynadakı müharibə üçün insan resurslarının çatışmazlığından danışıb.
“Artıq təkcə Ukrayna ilə qarşıdurma, Ukrayna ilə müharibə üçün belə insanlarımız çatışmır. Rus kişiləri tükənir. Bizə daha bir, iki, üç respublika lazımdır ki, oradan özümüzü hərbi və əmək qüvvəsi ilə təmin edə bilək”, – o bildirib.
Rusiyanın müharibəyönlü media məkanında belə Prilepinin bu sözləri tənqid olunub. “Reportyorı”nın baş redaktoru Nadana Fridrixson onun açıqlamasını “məğlubiyyətçi ritorika” adlandıraraq, əgər Rusiyanın Ukrayna cəbhəsində insan çatışmazlığı varsa, başqa ölkə və respublikaların Rusiyaya qatılmasının necə həyata keçiriləcəyinin aydın olmadığını qeyd edib.
Prilepin konkret olaraq hansı “2-3 respublikanı” nəzərdə tutduğunu bu çıxışında açıqlamayıb. Eyni zamanda, çıxış keçmiş sovet respublikalarının Rusiyaya birləşdirilməsi ideyasını açıq şəkildə müdafiə edir.
Bu, Prilepinin postsovet ölkələri ilə bağlı ilk belə bəyanatı deyil. “Reuters” 2023-cü ilin dekabrında onun Özbəkistanın və bəzi digər ölkələrin Rusiyaya birləşdirilməsini təklif etdiyini yazmışdı. Həmin açıqlamadan sonra Özbəkistan Rusiya səfirini Xarici İşlər Nazirliyinə çağırmışdı. Rusiya səfiri isə Prilepinin sözlərinin Kremlin rəsmi mövqeyini əks etdirmədiyini bildirmişdi.
Prilepin uzun müddətdir Ukraynaya qarşı müharibəni dəstəkləyən tanınmış rus millətçi fiqurlarından biridir. “Reuters” onun Donbasda Rusiya tərəfdarı silahlı birləşmələrin fəaliyyətində iştirak etdiyini və müharibəni açıq şəkildə müdafiə etdiyini qeyd edir.
Hazırda Prilepinin son bəyanatının Rusiya hökumətinin rəsmi xarici siyasət mövqeyi olduğuna dair təsdiqlənmiş məlumat yoxdur.
