Pakistan ordusunun komandanı, feldmarşal Asim Münir yüksək vəzifəli rəsmilərdən ibarət nümayəndə heyəti ilə İranın paytaxtı Tehrana səfər edib. Səfər ABŞ və İran arasında siyasi-hərbi gərginliyin davam etdiyi bir dövrdə baş tutub.
MSNews.az xəbər verir ki, bu barədə oktyabrın 20-də İran mediası məlumat yayıb.
İranın “Mehr” xəbər agentliyinin məlumatına əsasən, Asim Münir Pakistan rəsmilərindən ibarət nümayəndə heyətinə rəhbərlik edir. İran Xarici İşlər Nazirliyinin sözçüsü İsmayıl Bəqai səfərin əsas məqsədinin iki ölkə arasında münasibətlərin və əməkdaşlığın genişləndirilməsi olduğunu bildirib.
Bəqai Pakistan nümayəndə heyətinin Tehrana ABŞ-dan siyasi mesaj və ya hərbi xəbərdarlıq gətirməsi barədə ehtimallara da münasibət bildirib. Onun sözlərinə görə, iki ölkə arasında bəzi təmaslar danışıqlar prosesi ilə əlaqəli olsa da, görüşlərin əsas hissəsi ikitərəfli münasibətlərə həsr olunur.
Pakistanın hərbi rəhbərinin səfəri Vaşinqtonla Tehran arasında diplomatik əlaqələrin gərginləşdiyi bir vaxta təsadüf edir.
Pakistan son aylarda ABŞ və İran arasında vasitəçilik təşəbbüsləri ilə çıxış edərək tərəflər arasında dialoqun bərpasına çalışıb. Xüsusilə Hörmüz boğazındakı vəziyyət, regional təhlükəsizlik və hərbi qarşıdurmaların diplomatik yollarla həlli İslamabadın vasitəçilik fəaliyyətinin əsas istiqamətlərindən olub.
Asim Münir bundan əvvəl də İran rəhbərliyi ilə yüksək səviyyəli görüşlər keçirib.
Hazırkı səfər çərçivəsində keçiriləcək görüşlərin tam proqramı, iştirakçıları və mümkün razılaşmalar barədə əlavə məlumat açıqlanmayıb.
Tehran və İslamabad arasında danışıqların nəticələri barədə rəsmi açıqlamaların yayımlanması gözlənilir.
