“Nyukasl”ın yeni mövsüm üçün təqdim etdiyi ev forması sosial mediada geniş müzakirələrə səbəb olub.
MSNews.az xəbər verir ki, “Nyukasl Yunayted” klubu 2026/27 mövsümü üçün “Adidas” istehsalı olan ev formasını rəsmi şəkildə təqdim edib. Klub açıqlamasında yeni dizaynı ənənəvi qara-ağ zolaqlara “cəsarətli və yenilənmiş yanaşma” kimi xarakterizə edib.
Yeni forma klassik “Nyukasl” rənglərini qorusa da, zolaqların fərqli qalınlıqda və pozulmuş formada verilməsi azarkeşlər arasında birmənalı qarşılanmayıb. “The Mag” nəşri formanın əvvəl yayılan sızdırılmış görüntülərlə üst-üstə düşdüyünü yazaraq dizaynı “barcode style”, yəni “ştrix-kod üslubu” kimi təqdim edib.
Sosial mediada bəzi azarkeşlər formanı klub tarixinin ən uğursuz dizaynlarından biri adlandırıb. “FanBanter” müxtəlif azarkeş reaksiyalarını toplayaraq qeyd edib ki, tərəfdarların bir hissəsi formanın “ştrix-kod”a bənzədiyini, digərləri isə dizaynın ənənəvi “Nyukasl” üslubundan uzaqlaşdığını düşünür.
Formanın rəsmi satış qiymətləri də açıqlanıb. “NUFC Store” məlumatına görə, kişi ev forması 85 funt sterlinqə, “authentic” versiyası isə 120 funt sterlinqə satışa çıxarılıb.
Azarkeşlər arasında Entoni Qordonla bağlı zarafatlar da yayılıb. Tərəfdarlar ingiltərəli futbolçunun “Barselona”ya keçidini yeni formanı geyinməmək istəyi ilə əlaqələndirən ironik paylaşımlar ediblər. Lakin bu, rəsmi fakt deyil, sosial media zarafatı kimi qiymətləndirilməlidir.
