Joze Mourinyo 13 ildən sonra yenidən “Real Madrid”in baş məşqçisi vəzifəsinə qayıdıb.
MSNews.az xəbər verir ki, Real Madrid rəsmi saytında portuqaliyalı mütəxəssisin əsas komandanın baş məşqçisi təyin olunduğunu açıqlayıb. Klubun məlumatına görə, Mourinyo ilə üç mövsümlük müqavilə imzalanıb və anlaşma 2029-cu il iyunun 30-dək qüvvədə olacaq.
“Real Madrid” bildirib ki, 63 yaşlı mütəxəssis komandaya iyulun 13-də, mövsümöncəsi hazırlığın başladığı gün qoşulacaq.
“Reuters”in məlumatına görə, Mourinyonun “Benfika”dan ayrılması üçün Madrid klubu 15 milyon avro ödəyib. Portuqaliya klubu isə Mourinyonun gedişindən sonra Marku Silvanı baş məşqçi təyin edib.
Bundan əvvəl “Reuters” “Real Madrid”in Alvaro Arbeloa ilə qarşılıqlı razılıq əsasında yollarını ayırdığını yazmışdı. Arbeloa yanvar ayında Xabi Alonsonun gedişindən sonra komandanın baş məşqçisi təyin olunmuşdu.
Qeyd edək ki, Mourinyo daha əvvəl 2010–2013-cü illərdə də “Real Madrid”i çalışdırıb. O, həmin dövrdə komanda ilə La Liqa, İspaniya Kuboku və İspaniya Superkubokunu qazanıb.
