Lionel Messi İspaniyanın ikinci liqasında çıxış edən “Eldense” klubunun majoritar səhmdarına çevrilməyə hazırlaşır. Klub argentinalı futbolçu ilə səhmlərin alınması barədə ilkin razılaşma əldə edildiyini açıqlayıb.
MSNews.az xəbər verir ki, “BBC Sport”un materialını yayımlayan “Yahoo” və “Reuters” bildirir ki, Messi hazırda klubun əsas səhmdarı olan “TH Soluciones Group”a məxsus səhmləri almağa razılaşıb. Sövdələşmə tamamlanarsa, 39 yaşlı futbolçu “Eldense”nin majoritar sahibi olacaq.
Klubun açıqlamasına görə, əməliyyat hələ yekunlaşmayıb. Tərəflər hüquqi və müqavilə prosedurlarını, o cümlədən “due diligence” yoxlamasını tamamlamalı, daha sonra İspaniyanın Ali İdman Şurasından icazə almalıdırlar.
“Eldense” Messinin İspaniyada sərmayə yatırdığı ikinci klub olacaq. Argentinalı ulduz bu ilin aprelində ölkə futbolunun beşinci pilləsində çıxış edən Kataloniya təmsilçisi “Kornelya”nı satın alıb. Klub həmin vaxt Messinin gəlişinin onun Barselona ilə əlaqələrini və yerli futbol istedadlarının inkişafına marağını gücləndirdiyini bildirmişdi.
Hazırda “Eldense” mövsümün ilk dörd oyunundan iki xal toplayıb və La Liga 2-də 20-ci pillədə qərarlaşıb. Klub uğursuz startdan sonra baş məşqçi Klaudio Barraqanla yollarını ayırıb.
Messi hazırda ABŞ-ın “İnter Mayami” klubunda çıxış edir. O, avqustun 31-də Argentina millisindəki karyerasını rəsmən başa vurub.
Messinin uzun illər əsas rəqibi olan Kriştianu Ronaldu da İspaniya futboluna sərmayə qoyub. “BBC Sport”un məlumatına görə, portuqaliyalı ulduz fevral ayında ikinci liqa təmsilçisi “Almeriya”nın 25 faizlik payını əldə edib.
