Almaniyanın keçmiş kansleri Angela Merkelin 2014–2015-ci illərdə bağlanmış Minsk razılaşmalarının Ukraynaya vaxt qazandırdığı və ölkənin 2022-ci ilədək daha güclü vəziyyətə gəlməsinə imkan verdiyi barədə sözləri yenidən gündəmə gəlib.
MSNews.az xəbər verir ki, sosial şəbəkələrdə Merkelə aid edilən yeni videofraqmentlərdə keçmiş kanslerin 2014-cü ildə Ukraynanın Rusiya qarşısında xeyli zəif vəziyyətdə olduğunu və Qərbin müəyyən çəkindirici təsir yaratmağa çalışdığını bildirdiyi qeyd olunur.
Merkel hələ 2022-ci ilin dekabrında “Die Zeit” qəzetinə müsahibəsində açıq şəkildə demişdi ki, “2014-cü il Minsk razılaşması Ukraynaya vaxt vermək cəhdi idi”. Onun sözlərinə görə, Ukrayna həmin müddətdən istifadə edərək güclənib və 2014–2015-ci illərdəki Ukrayna ilə 2022-ci ildəki Ukrayna eyni vəziyyətdə olmayıb.
Keçmiş kansler Debaltseve uğrunda 2015-ci ilin döyüşlərini nümunə göstərərək həmin dövrdə Rusiya qüvvələrinin Ukraynaya daha ağır zərbə vurmaq imkanının olduğunu düşündüyünü də söyləmişdi. O, NATO ölkələrinin o vaxt Ukraynaya 2022-ci ildən sonra göstərilən miqyasda yardım edə biləcəyinə şübhə etdiyini vurğulamışdı.
Eyni mövqeyi Merkel 2022-ci ilin iyununda verdiyi geniş müsahibədə də müdafiə etmişdi. “DW” onun Minsk prosesinin vəziyyəti müəyyən qədər sakitləşdirdiyini və Ukraynaya inkişaf üçün təxminən yeddi il vaxt verdiyi barədə fikirlərini yayıb.
Merkel 2026-cı ilin mayında “WDR Europaforum” çərçivəsində verdiyi müsahibədə də Ukraynaya hərbi dəstəyi “tamamilə doğru” hesab etdiyini və Avropanın çəkindirici imkanlarını gücləndirməli olduğunu deyib. Eyni zamanda o, hərbi çəkindirmə ilə diplomatiyanın paralel aparılmasının vacibliyini vurğulayıb.
Sentyabrın əvvəlində Rumıniyanın “Știrile PRO TV” kanalına verdiyi müsahibədə isə Merkel Vladimir Putinin 2022-ci ildə Ukraynaya genişmiqyaslı hücumunu beynəlxalq hüququn pozulması adlandırıb və Rusiyanın keçmiş imperiyanı bərpa etmək cəhdinə “heç bir bəraət olmadığını” bildirib. Bununla yanaşı, o, gələcəkdə Rusiya ilə dialoqun yenidən qurulmalı olduğunu da deyib.
