Konqo Demokratik Respublikasının milli komandası Ebola epidemiyası ilə bağlı ABŞ-ın tətbiq etdiyi səhiyyə protokollarına əməl etməsə, DÇ-2026 üçün ölkəyə buraxılmaya bilər.
“Reuters”–in məlumatına görə, Ağ Evin Dünya Çempionatı üzrə İşçi Qrupunun icraçı direktoru Endryu Culiani ESPN-ə bildirib ki, Konqo nümayəndə heyəti ABŞ-a gəlməzdən əvvəl 21 günlük izolyasiya “bubble” rejimini qoruyub saxlamalıdır. Əks halda komandanın ABŞ-a girişinə icazə verilməyə bilər.
Culiani bildirib ki, Konqo tərəfinə bu tələb açıq şəkildə çatdırılıb: komanda iyunun 11-də Hyustona gəlmək istəyirsə, Belçikadakı hazırlıq düşərgəsində 21 gün ərzində izolyasiya rejimini pozmamalıdır. Onun sözlərinə görə, “bubble” rejimi qorunmasa, komanda ABŞ-a səyahət edə bilməmək riski ilə üzləşəcək.
Konqo DR millisinin nümayəndəsi isə hazırda hazırlıq planında dəyişiklik olmadığını bildirib. Komanda iyunun 3-də Belçikanın Lyej şəhərində Danimarka, iyunun 9-da isə İspaniyanın Kadis şəhərində Çili ilə yoxlama oyunu keçirməyi planlaşdırır. Yığmanın bütün futbolçularının Konqodan kənarda, əsasən Avropada çıxış etdiyi, yalnız bəzi rəsmi nümayəndələrin bu həftə Belçikadakı düşərgəyə Konqodan gəldiyi qeyd olunur.
Komanda daha əvvəl Kinşasada üçgünlük hazırlıq toplanışı və azarkeşlərlə vida mərasimi keçirməyi planlaşdırsa da, Ebola epidemiyasına görə bu səfər ləğv edilib. Konqo DR 52 ildən sonra ilk dəfə dünya çempionatında çıxış etməyə hazırlaşır. Komanda “K” qrupunda Portuqaliya, Kolumbiya və Özbəkistanla mübarizə aparacaq. İlk oyun iyunun 17-də Hyustonda Portuqaliyaya qarşı keçiriləcək.
Ebola epidemiyası ölkədə ciddi narahatlıq yaradıb. Ümumdünya Səhiyyə Təşkilatı Konqoda Bundibugyo ştammlı Ebola epidemiyasının milli miqyasda yayılma riskini “çox yüksək” səviyyəyə qaldırıb. CIDRAP-ın məlumatına görə, ölkədə təxminən 750 şübhəli yoluxma və 177 ölüm qeydə alınıb; təsdiqlənmiş hallar isə 82 yoluxma və 7 ölüm kimi göstərilir.
Mütəxəssislər qeyd edirlər ki, Bundibugyo ştammı üçün hazırda təsdiqlənmiş xüsusi vaksin və müalicə yoxdur. ÜST bu ştamm üzrə peyvənd və müalicə variantlarının qiymətləndirilməsi üzərində işləyir, lakin mümkün vaksin tətbiqinin aylarla vaxt apara biləcəyi bildirilir.
