İsrail bu ay Fələstin Administrasiyası adından topladığı vergi və gömrük gəlirlərini Ramallaha köçürməkdən imtina edib. İsrailin maliyyə naziri Bezalel Smotriç aprelin 27-də bildirib ki, aprel ayı üzrə toplanan təxminən 740 milyon şekel məbləğində “klirinq gəlirləri” Fələstin Administrasiyasına transfer edilməyib. Bu qərar Smotriçin son bir ilə yaxındır davam etdirdiyi vəsaitlərin dondurulması siyasətinin bir hissəsi kimi təqdim olunur.
MSNews.az xəbəri “The Times of Israel”-ə istinadən verir.
İsrail Maliyyə Nazirliyinin açıqlamasına görə, bu məbləğin təxminən 590 milyon şekeli Fələstin Administrasiyasının İsrail elektrik, su və ekoloji xidmət qurumlarına olan borclarının ödənilməsi üçün tutulub. Nazirlik həmçinin iddia edir ki, vəsaitlərin bir hissəsi “terrorla əlaqəli ödənişlərin” qarşısının alınması məqsədilə saxlanılıb.
Smotriç qərarı müdafiə edərək bildirib ki, İsrail “israilli mülki şəxslərə zərər verən terrorçulara çata biləcək vəsaitləri” köçürməyəcək. Onun sözlərinə görə, Fələstin Administrasiyasının beynəlxalq platformalarda İsrailə qarşı addımları və İsrailin “terroru təşviq edən ödənişlər” kimi xarakterizə etdiyi siyasət bu qərarın əsas səbəblərindəndir.
Fələstin tərəfi isə İsrailin bu addımını iqtisadi təzyiq kimi qiymətləndirir. Ramallah administrasiyası artıq uzun müddətdir maaşları tam ödəməkdə çətinlik çəkir. “Times of Israel”in məlumatına görə, İsrailin topladığı bu vergi gəlirləri Fələstin Administrasiyasının gəlirlərinin təxminən 60 faizini təşkil edir və onların dayandırılması hökumətin əməkhaqqı, sosial ödəniş və əsas xidmətləri maliyyələşdirmə imkanlarını ciddi şəkildə məhdudlaşdırır.
Bu vəsaitlər İsrail tərəfindən Fələstin Administrasiyası adından toplanan vergi və gömrük gəlirləridir. Oslo razılaşmalarından sonra formalaşan mexanizmə əsasən, İsrail Fələstin ərazilərinə gedən mallardan vergi toplayır və bu məbləğləri Fələstin Administrasiyasına köçürməlidir. Son illərdə isə bu transferlər İsrail-Fələstin siyasi gərginliyinin əsas təzyiq alətlərindən birinə çevrilib.
