Hindistanın Uttar-Pradeş ştatının Fatehpur rayonundakı Hardauli kəndində mobil şəbəkənin uzun müddətdir zəif olmasından narazı sakinlər rabitə qülləsinə texniki baxış üçün gələn əməkdaşı saxlayaraq qülləyə bağlayıblar.
MSNews.az xəbər verir ki, hadisə sentyabrın 10-da baş verib. “The Indian Express”-in polisə istinadən yaydığı məlumata görə, texnik Aditya Bhan Singh qüllədə işlədiyi zaman kənd sakinləri onu əhatəyə alıblar. Hadisəni əks etdirən görüntülər daha sonra sosial şəbəkələrdə yayılıb.
Sakinlər bildiriblər ki, kənddə rabitə qülləsi təxminən iki il əvvəl quraşdırılsa da, mobil bağlantı ilə bağlı problemlər aradan qalxmayıb. Polis araşdırması zamanı kəndlilər 5G tariflərinə ödəniş etdiklərini, lakin faktiki olaraq zəif 4G bağlantısı aldıqlarını və rabitənin tez-tez kəsildiyini deyiblər.
“NDTV” sakinlərin şirkətə dəfələrlə müraciət etdiklərini, lakin problemin həll olunmadığını iddia etdiklərini yazır. Kəndlilər əməkdaşın şirkət rəhbərliyinin diqqətini problemə yönəltmək üçün saxlanıldığını bildiriblər.
“The Times of India”-nın məlumatına görə, texnik təxminən iki saat saxlanılıb. Hadisə barədə məlumat alan polis əraziyə gəlib. Aditya Bhan Singh-in şikayətindən sonra Hindistan Cinayət Məcəlləsinin qanunsuz azadlıqdan məhrumetmə ilə bağlı müddəası üzrə cinayət işi açılıb.
Hadisə ilə bağlı son məlumatda “The Indian Express” polisin yeddi şəxsin kimliyini müəyyənləşdirdiyini və onlardan altısının saxlanıldığını bildirib. Fatehpur polis rəisi Abhimanyu Manglik də hadisənin sosial şəbəkələrdə yayılan görüntülərdən sonra araşdırıldığını açıqlayıb.
Maraqlıdır ki, “The Times of India”-nın istinad etdiyi bəzi mənbələr texnikin şikayətin şirkətin yüksək vəzifəli şəxslərinə çatması üçün sakinlərə onu saxlamağı özü təklif etdiyini iddia edirlər. Lakin əməkdaşın polisə verdiyi şikayətdə onun kənd sakinləri tərəfindən saxlanıldığı göstərilir. Buna görə bu detal hələlik birmənalı təsdiqlənmiş fakt hesab edilmir.
