Rusiyanın aparıcı enerji şirkətləri ölkədə yaranan yanacaq çatışmazlığı fonunda Hindistan neft emalı zavodlarından əlavə benzin tədarükü istəyib.
MSNews.az xəbər verir ki, “Reuters” agentliyinin məsələ ilə tanış mənbələrə istinadən yaydığı məlumata görə, “Rosneft”, “Qazprom Neft” və “Lukoil” Hindistanın həm dövlətə məxsus, həm də özəl neft emalı şirkətləri ilə əlaqə saxlayıb.
Hindistanın üç dövlət neft emalı şirkətindəki mənbələr Rusiya tərəfinin əlavə benzin həcmləri ilə bağlı müraciət etdiyini təsdiqləyiblər. Bununla belə, onlar hazırda ixrac üçün artıq yanacaq ehtiyatlarının olmadığını bildiriblər.
Hindistanın əsas dövlət neft şirkətləri sırasında “Indian Oil Corporation”, “Bharat Petroleum” və “Hindustan Petroleum” yer alır. Şirkətlər, eləcə də Rusiyanın adı çəkilən enerji müəssisələri “Reuters”in rəsmi şərh sorğularına cavab verməyiblər. Buna görə məlumat anonim sənaye mənbələrinin açıqlamalarına əsaslanır.
Rusiyanın əlavə yanacaq axtarışı Ukraynanın neft emalı zavodlarına hücumları nəticəsində ölkənin emal gücünün əhəmiyyətli hissəsinin sıradan çıxması ilə əlaqələndirilir. Mənbələrə görə, yeni hücumlar olmadığı halda belə, Rusiyanın neft emalı imkanlarının təxminən 40 faizinin azı iki ay ərzində tam bərpa edilməyəcəyi ehtimal olunur.
Rusiya daha əvvəl də Hindistandan dəniz yolu ilə benzin idxalına başlayıb. “Reuters” iyulun əvvəlində sənaye mənbələrinə istinadən Hindistandan Rusiyaya azı 60 min ton benzin göndərildiyini bildirmişdi. Rusiya Prezidentinin sözçülüyü də Moskvanın münasib qiymətlərlə yanacaq idxalı üçün digər ölkələrlə danışıqlar apardığını açıqlamışdı.
Sonrakı araşdırma yanacağın Hindistanın “Nayara Energy” şirkətinin Vadinar zavodunda istehsal edildiyini göstərib. “Rosneft”in “Nayara Energy”də 49,13 faizlik payı var.
Gəmi izləmə məlumatlarına əsasən, “Agni” tankeri iyunun 18-20-də Vadinar limanında 42 min ton benzin yükləyib və daha sonra Misir yaxınlığında yükünü “Garnet” gəmisinə ötürüb. Digər “Varg” tankerinin də eyni limandan benzin götürdüyü və yükün başqa gəmi vasitəsilə Rusiyaya çatdırılmasının nəzərdə tutulduğu bildirilir.
Bununla belə, “Nayara Energy” yanacağı birbaşa Rusiya şirkətlərinə satdığını təkzib edib. Şirkət “Reuters”ə bildirib ki, Rusiya şirkətlərinə yanacaq satmayıb və belə satış planlaşdırmır. Hindistanın neft naziri Hardip Sinq Puri də Hindistan şirkətlərinin Rusiyaya birbaşa yanacaq satmadığını, lakin Rusiya alıcılarının Hindistan mənşəli məhsulu vasitəçi treyderlərdən əldə edə biləcəyini deyib.
Beləliklə, məsələ Hindistanın Rusiyanın müraciətini siyasi səbəblərlə rədd etməsi kimi qiymətləndirilə bilməz. Mövcud məlumata görə, üç dövlət şirkəti sadəcə ixraca yönəldə biləcəyi əlavə benzin həcminin olmadığını bildirib.
