Rusiya Xarici İşlər Nazirliyi Azərbaycan tərəfindən cinayət təqibinə cəlb edilərək beynəlxalq axtarışa verilən Semyon Uralov, Aleksey Çadayev və İvan Knyazevin Azərbaycana dair açıqlamalarının Moskvanın rəsmi mövqeyini əks etdirmədiyini bildirib.
MSNews.az xəbər verir ki, Rusiya XİN-in rəsmi nümayəndəsi Mariya Zaxarova həmin şəxslərin fikirlərini “özəl şəxslərin açıqlamaları” kimi xarakterizə edib. “Bu şəxslərin bəyanatları heç bir şəkildə Moskvanın Azərbaycana və respublika ilə münasibətlərə yanaşmasını əks etdirmir”, – deyə Zaxarovanın açıqlamasında bildirilir. Rusiya mediası da XİN-in bu mövqeyi rəsmən açıqladığını xəbər verir.
Zaxarova Moskvanın Azərbaycanla münasibətlərin 22 fevral 2022-ci ildə imzalanmış Müttəfiqlik qarşılıqlı fəaliyyəti haqqında Bəyannamə əsasında inkişaf etdirilməsinin tərəfdarı olduğunu vurğulayıb. Həmin sənəddə tərəflərin suverenlik, ərazi bütövlüyü, daxili işlərə qarışmamaq və mübahisələrin dinc yolla həlli prinsiplərinə sadiqliyi təsbit olunub.
Bununla yanaşı, Rusiya XİN bildirib ki, zərurət yaranarsa, Moskva Azərbaycan Baş Prokurorluğunun qərarı fonunda öz vətəndaşlarının qanuni hüquq və maraqlarının müdafiəsi üçün tədbirlər görəcək. Zaxarova eyni zamanda Azərbaycan informasiya məkanında Rusiyaya qarşı “qeyri-dost narrativlərin” mövcud olduğunu iddia edib və Moskvanın informasiya gündəliyi ilə bağlı ikitərəfli məsləhətləşmələrin keçirilməsini təklif etdiyini bildirib. Bu mövqe Rusiyanın qiymətləndirməsidir.
Azərbaycan Baş Prokurorluğu avqustun 17-də Uralov, Knyazev və Çadayev barəsində Cinayət Məcəlləsinin terrorçuluğa açıq çağırışlar, dövlət əleyhinə açıq çağırışlar və milli nifrətin salınması ilə bağlı maddələri üzrə cinayət işi çərçivəsində təqsirləndirilən şəxs qismində cəlb edilmələrinə dair qərar qəbul edib. Baş Prokurorluğun versiyasına görə, onların 14 iyul və 13 avqust tarixli “Чистота понимания” verilişlərində Azərbaycana qarşı zorakılıq və ayrı-ayrı şəxslərin fiziki məhv edilməsi ilə bağlı çağırışlar səsləndirdiklərinə dair əsaslı şübhələr müəyyən edilib. Hər üç şəxs ölkə xaricində olduğundan barələrində həbs qətimkan tədbiri seçilib və beynəlxalq axtarış elan olunub.
Rusiya XİN-in reaksiyasından əvvəl Azərbaycanın Moskvadakı son ritorika ilə bağlı diplomatik etirazı da olmuşdu. Avqustun 18-də Rusiyanın Azərbaycandakı səfiri Mixail Yevdokimov XİN-ə çağırılıb və ona Rusiya media məkanında Azərbaycan, Azərbaycan xalqı və ölkə rəhbərliyinə qarşı səsləndirilən təhdid və təhqirlərdən ciddi narahatlıq çatdırılıb. “Kommersant” Azərbaycan XİN-in Rusiyadan bu ritorikanın qarşısını almaq üçün təcili tədbirlər gözlədiyini yazıb.
