Gürcüstanda Dövlət Təhlükəsizliyi Xidmətinin keçmiş, hazırda isə Daxili İşlər Nazirliyinin əməkdaşı olan şəxs saxlanılıb.
Gürcüstan Dövlət Təhlükəsizliyi Xidmətinin məlumatına görə, əməliyyat qurumun Baş Müfəttişliyi ilə Daxili İşlər Nazirliyinin Baş Müfəttişliyinin birgə tədbirləri nəticəsində keçirilib. Saxlanılan şəxs Dövlət Təhlükəsizliyi Xidmətindən məxfi məlumatların qanunsuz şəkildə çıxarılmasında ittiham olunur.
MSNews.az yerli mediaya istinadən xəbər verir.
Bildirilib ki, faktla bağlı istintaq Gürcüstan Cinayət Məcəlləsinin 321-ci maddəsi ilə aparılır. Bu maddə dövlət sirrinin qorunması qaydalarının pozulmasını nəzərdə tutur.
Gürcüstan Dövlət Təhlükəsizliyi Xidməti bəyan edib ki, qurum daxili informasiyanın, hətta kiçik həcmli məlumatların belə qanunsuz çıxarılmasına qarşı “xüsusilə sərt və barışmaz” mövqe tutacaq. Qurum oxşar əməllərə yol verən şəxslərin ciddi şəkildə cəzalandırılacağını vurğulayıb.
